ԵՐԵՎԱՆ, 6 նոյեմբերի — Sputnik, Լաուրա Սարգսյան. Վրաստանի Հանրային հեռուստատեսության Առաջին ալիքը երկրի ազգային փոքրամասնություններին նվեր է մատուցել։ Կայքի նորությունները հասանելի են միաժամանակ յոթ լեզվով, որոնց թվում կա նաև հայերենը, ասել է «Մոամբե» նորությունների տեղեկատվական ծառայության ղեկավար Գեորգի Գվիմրաձեն։
«Կայքի վրացական տարբերակով լույս տեսած լուրերն այժմ հասանելի են նաև հայերեն, ռուսերեն, ադրբեջաներեն, անգլերեն, աբխազերեն, օսերեն լեզուներով», — Sputnik Արմենիայի թղթակցի հետ զրույցում ասել է Գվիմրաձեն:
Առաջին ալիքի կայքն այս քայլն արել է, որպեսզի տեղեկատվական հոսքի մեջ ներգրավվեն բնակչության բոլոր խավերն ու ազգերը: Բացի դրանից, երկրում պետական` վրացերեն լեզվին չտիրապետելու խնդիրը դեռևս արդիական է: Տարբեր էթնիկ փոքրամասնությունների ներկայացուցիչների միջև վրացերենը այդքան էլ տարածված չէ:
«Մեր հասարակության յուրաքանչյուր անդամ պետք է տեղեկացված լինի երկրում տեղի ունեցող իրադարձությունների մասին և դուրս չգա հոսքից», — ավելացրել է Գվիմրաձեն:
Հանրային հեռարձակողը սրանով չի եզրափակվում: Համատեղ աշխատանք է տարվում Վրաստանի Հանրային պաշտպանի գրասենյակի ներքո գտնվող Ազգային փոքրամասնությունների խորհրդի հետ: Հեռարձակման ռազմավարություն է մշակվում Առաջին տեղեկատվականի ոչ վրացախոս հատվածի համար:
Նույնիսկ հնարավոր է Առաջին ալիքի կայքում բացվի նորությունների բլոկ` Վրաստանում համայնքների կյանքի և գործունեության մասին:
«Վրաստանի հայերի համայնքը» դրական է գնահատում այն քայլերը, որոնք պետությունն անում է ազգային փոքրամասնությունների համար:
«Մենք դրական ենք գնահատում այն, ինչ պետությունն անում է այս ուղղությամբ: Բայց լավ կլիներ, եթե բովանդակությունն արտացոլեր ոչ միայն կառավարության շահերը, այլև ազգային փոքրամասնությունների դիրքորոշումը», — ասել է «Վրաստանի հայ համայնքի» վարչության անդամ Սանդրո Օհանյանը Sputnik Արմենիայի հետ զրույցում:
Նա համարում է, որ հեռարձակման ցանցում փոփոխություններ կատարելիս անհրաժեշտ է խորհրդակցել էթնիկ փոքրամասնությունների ներկայացուցիչների հետ:
2016 թվականից «Մոամբե» լրատվական թողարկումը հասանելի է ինչպես հայ, այնպես էլ ադրբեջանական համայնքների համար` իրենց մայրենի լեզուներով: Կա նաև միաժամանակ թարգմանության գործառույթը:
Ղեկավարությունը եկավ այն եզրակացության, որ նախորդ 12 րոպեանոց հեռարձակումը, որտեղ համայնքի ներկայացուցիչները պատմում էին իրենց ներքին կյանքի մասին, անարդյունավետ էր: Այն թույլ չէր տալիս ամբողջական պատկերացում կազմել երկրում կատարվողի մասին: Իսկ ազգային փոքրամասնությունների ներկայացուցիչները մնացել էին լրատվական իրադարձությունների հոսքից դուրս:
