ԵՐԵՎԱՆ, 6 նոյեմբերի – Sputnik. Բանակում պետք է բոլորը ծառայեն, ԱԺ-ում ասաց կրթության և գիտության նախարար Լևոն Մկրտչյանը՝ պատգամավորական հանձնաժողովներում պետական բյուջեի նախագծի քննարկման ժամանակ:
«Իմ դիրքորոշումն անփոփոխ է 1992 թվականից»,- ասաց Մկրտչյանը:
Ուսանողների համար բանակից տարկետման վերաբերյալ օրենքի նախագծի մասին կրթության նախարարը մտածում է այնպես, ինչպես պաշտպանության նախարարը:
«Կրթությանը չի խանգարի ծառայությունը: Շատ երկրների փորձը դա հաստատում է, և եթե նայենք, թե պաշտպանած թեկնածուներից ով է զբաղվում գիտությամբ, ապա պատկերը ոչ այնքան բարենպաստ կլինի»,- ասաց նախարարը:
2016 թվականի ապրիլյան իրադարձությունները միշտ կարող են կրկնվել, և յուրաքանչյուր քաղաքացին պետք է պատրաստ լինի կատարել իր պարտքը հայրենիքի հանդեպ, ընդգծել է նախարարը:
Նշենք, որ 1992 թ. արցախյան հակամարտության ամենաթեժ ժամանակ ապագա նախարարը անցնում էր իր «ռազմական ճանապարհը» Երևանի պետական համալսարանում: 1986-98 թթ. նա եղել է այնտեղ որպես ասպիրանտ և դասախոս:
«Զինծառայողների կարգավիճակի և զինվորական ծառայության մասին» օրենքում կատարված փոփոխությունների նախագիծը, ի թիվս այլ կետերի, առաջարկում է տարեկետումը չեղյալ համարել պետպատվերով համալսարաններում սովորող ուսանողների համար: Հոկտեմբերի 27-ին խորհրդարանը ընդունեց այն առաջին ընթերցմամբ:
