ԵՐԵՎԱՆ, 5 նոյեմբերի — Sputnik. Հայաստանի 69 համայնքում այսօր տեղական ինքնակառավարման մարմինների ընտրություններ են: 3 համայնքում համայնքի ղեկավարների արտահերթ ընտրություններ են, իսկ 34-ն այն խոշորացված համայնքներն են, որոնց բնակիչները պետք է նոր ղեկավարներ ընտրեն:
Ինչպես հայտնում են ԿԸՀ-ից, առավոտյան՝ ժամը 8.00-ին, ՀՀ ընտրական օրենսգրքով սահմանված կարգով բացվել են ընտրությունների համար համայնքներում ձևավորված բոլոր 527 ընտրական տեղամասերը և ընդունել ընտրողներին:
Քվեարկության մասնակիցների թիվը, ըստ համայնքների, ԿԸՀ-ն կհրապարակի ժամը 12.00-ից սկսած՝ երեքժամյա պարբերականությամբ:
Մամուլում տարածված տեղեկությունները, թե ընտրատեղամասերի մեծ մասում տեսախցիկներ չկան, ԿԸՀ-ն չի հերքում, բայց և հիշեցնում է՝ ՏԻՄ ընտրությունների ընթացքում քվեարկության և արդյունքների ամփոփման տեսանկարահանման և միաժամանակյա համացանցային հեռարձակման կազմակերպում Ընտրական օրենսգրքով չի նախատեսվում:
