Լաուրա Սարգսյան, Sputnik Արմենիա
«Վրացական երազանք» իշխող կուսակցությունը ջեքփոթ շահեց` հայաբնակ Սամցխե-Ջավախքի շրջանում հայ թեկնածու առաջադրելով: Անիվարդ Մոսոյանը դարձավ Նինոծմինդայի քաղաքապետ, Յուրիկ Հունանյանը` Ախալքալաքի:
Երկուսն էլ «Վրացական երազանք» կուսակցությանը մանդատներ ապահովեցին այս տարածաշրջանում: Սակայն նույնը չի կարելի ասել Թբիլիսիի հայերի մասին, «Վրացական երազանքը» նույնիսկ հույս չդրեց նրանց վրա:
«Իշխող կուսակցությունն անհրաժեշտ չհամարեց, ցուցակներում ազգային փոքրամասնությունների ներկայացուցիչներ ներառել: Այլ կուսակցությունների ցուցակներում մի քանի ազգանուն կար, որոնք, բնականաբար, հնարավորություն չունեին ընտրվելու», — Sputnik Արմենիայի թղթակցի հետ զրույցում ասաց «Վրաստանի հայ համայնք» կազմակերպության վարչության անդամ Սանդրո Օհանյանը:
Քաղաքի կառավարման մեջ հայերի պասիվ մասնակցությունը նա բացատրում է տեղական իշխանությունների քաղաքականությամբ: Թբիլիսին բազմազգ քաղաք է, սակայն այս առավելությունը ոչ մի կերպ չի արտացոլվում իշխանական կառույցներում:
Իրավիճակը բարդացնում է նաև այն, որ համայնքը չի կարող իր թեկնածուներին առաջադրել այս կամ այն կուսակցությունից։ Այդ դեպքում նրան կարող են մեղադրել այս կամ այն քաղաքական ուժին համակրելու մեջ։ Հարցը պետք է լուծվի սահմանադրական փոփոխությունների ճանապարհով։
«Այսօր երկրում այնպիսի օրենք չկա, որով էթնիկ փոքրամասնություններն իրավունք ունենային առաջադրելու իրենց թեկնածուներին այս կամ այն պաշտոնի համար։ Դա բարդացնում է էթնիկ փոքրամասնությունների գործը», – ասաց Օհանյանը։
Հայաստանի պետական կառավարման ակադեմիայի Տարածաշրջանային հետազոտությունների կենտրոնի գիտաշխատող, Վրաստանի հարցերով փորձագետ Ջոնի Մելիքյանը համոզված է, որ քիչ է մնացել. էթնիկ փոքրամասնությունների հետ կապված իրավիճակը կփոխվի դեպի լավը` հաշվի առնելով այն ակտիվությունը, որը վերջին ժամանակները ցուցաբերում է երիտասարդությունը։
«Մի կողմից որոշվում է Վրաստանում բնակվող այլազգիների պետական լեզվի իմացության խնդիրը, մյուս կողմից փոխվում է բուն վրացական հասարակությունը և նրա վերաբերմունքը էթնիկ փոքրամասնությունների նկատմամբ», – ասաց Մելիքյանը։
Նա հույս ունի, որ ինչպես հաջորդ խորհրդարանական, այնպես էլ տեղական ինքնակառավարման մարմինների ընտրություններում, հայ համայնքից նոր դեմքեր կառաջադրվեն։
Երևանում և Թբիլիսիում չեն զարմանում Ջավախքի շուրջ ստեղծված իրավիճակի վերաբերյալ։ Հայերով բնակեցված այդ շրջանում հաղթելու համար, իշխող կուսակցությունը պետք է հույսը դներ էթնիկ հայերի վրա։
«Ես հաղթանակ էի սպասում, քանի որ Նինոծմինդան իմ հարազատ քաղաքն է, և հույս ունեի, որ մեր բնակիչները կաջակցեն», – Sputnik Արմենիայի թղթակցի հետ զրույցում ասաց Մոսոյանը։
Նա նշեց, որ Վրաստանում պայմաններ են ստեղծվում հասարակության մեջ էթնիկ փոքրամասնությունների ինտեգրման համար։
Վրաստանում տեղական ինքնակառավարման մարմինների ընտրություններն անցկացվել են հոկտեմբերի 21-ին։ Դրանց արդյունքում գրեթե բոլոր շրջաններում հաղթանակ են տարել «Վրացական երազանք» իշխող կուսակցության ներկայացուցիչները։
