ԵՐԵՎԱՆ, 2 նոյեմբերի — Sputnik. Որքան շուտ ընդունվեն «Ես եմ» ծրագրի ենթաօրենսդրական ակտերը, այնքան ավելի շուտ հնարավոր կլինի օգտվել այլընտրանքային ծառայությունից։ Այս մասին այսօր կառավարության նիստի ժամանակ հայտնեց պաշտպանության նախարար Վիգեն Սարգսյանը` պատրաստակամություն հայտնելով շտապ զբաղվել այս հարցով։
«Պաշտպանության նախարարությունն ամեն ինչ անելու է, որ «Զինվորական ծառայության և զինծառայողի կարգավիճակի մասին» նախագծի ընդունման դեպքում հասցնի և ներդնի «Ես եմ» ծրագրի մեխանիզմները և ենթաօրենսդրական ակտերը»,-ասաց Սարգսյանը։
Ըստ «Ես եմ» ծրագրի` նորակոչիկները, որոնք ցանկություն կհայտնեն ծառայությունն իրականացնել մարտական հերթապահության մեջ, իրավունք կստանան անցնելու ծառայության ժամկետային պայմանագրային տեսակի: Ծառայությունը կտևի 3 տարի, բայց ընդհանուր առմամբ 7 ամիս զինծառայողը կանցկացնի ազատ արձակման մեջ։
Նորակոչիկը մեկ շաբաթ կանցկացնի արձակուրդում, մեկ շաբաթ էլ` զորամասում, հետո երկու շաբաթ կմեկնի առաջնագիծ։
Նա նաև անդրադարձավ 2017 թվականի ձմեռային զորակոչի կազմակերպմանն ու անցկացմանը։ Ձմեռային զորակոչն անցկացվելու է ընթացիկ տարվա նոյեմբերից մինչև 2018 թվականի հունվարը։
