ԵՐԵՎԱՆ, 25 հոկտեմբերի — Sputnik. 18 տարեկան երիտասարդների կողմից երկու երեխայի որդեգրումն ամենայն հավանականությամբ տարկետման կեղծ հիմքեր ստեղծելու նպատակ ունի։ ԱԺ-ում «Զինվորական ծառայության և զինծառայողի կարգավիճակի մասին» ՀՀ օրենքի նախագծի քննարկման ժամանակ ասաց ՀՀ պաշտպանության նախարար Վիգեն Սարգսյանը։
«Եթե մտադիր է երեխաներ որդեգրել, թող գնա ծառայի, վերադառնա, հետո նոր որդեգրի»,- նշեց Սարգսյանը։
Ներկայացնելով օրինագծի տվյալ դրույթը` նախարարը հայտնեց, որ լինում են դեպքեր, երբ բանակից խուսափելու համար որդեգրում են եղբոր կամ այլ հարազատի երեխաներին։
Նոր օրենքը տարկետման իրավունք է սահմանելու այն անձանց համար, ովքեր բացառությամբ որդեգրվածից ունեն 2 և ավելի սեփական երեխա:
Վիգեն Սարգսյանն անդրադարձավ նաև ՊՆ-ի ներկայացրած «Պատիվ ունեմ» և «Ես եմ» պայմանագրային ծառայության ծրագրերին` ասելով, որ դրանք թեև իրավական հիմք են ստանալու օրենքի ընդունումից հետո, բայց դրանց նկատմամբ արդեն իսկ զորակոչային տարիքի երիտասարդների շրջանում 25% հետաքրքրություն կա։
«Եթե օրենքն ընդունվի, և այս ծրագրերը սկսեն գործել, արդեն առաջիկա 3 տարում մենք միայն այս ծրագրերի մասնակիցներով առաջնագծում 100% ապահովվածություն կունենանք»,- ասաց Սարգսյանը։
Անդրադառնալով բուհերի ուսանողների համար տարկետման իրավունքի վերացման դրույթին` նախարարը հայտարարեց. «Քաղաքականությունն այս է՝ պետք է ծառայեն բոլորը»։
Բարձրագույն կրթություն և գիտական ներուժ ունեցողն, ըստ Սարգսյանի, կարող է ծառայել որպես սպա, իսկ ով կցանկանա 2 տարի ծառայել, կարող է զորակոչվել որպես շարքային զինվոր։
