ԵՐԵՎԱՆ, 1 նոյեմբերի – Sputnik. Մեծամորի ԱԷԿ-ի փակման վերաբերյալ քննարկումները, որոնք պայմանավորված են Հայաստանի և Եվրամիության միջև համաձայնագրով, իրականության հետ կապ չունեն: Այդ մասին ՌԻԱ Նովոստիին տված հարցազրույցում հայտարարել է Հայաստանի նախագահ Սերժ Սարգսյանը:
«Այդ քննարկումներն արհեստական բնույթ ունեն: Եվրամիության հետ համաձայնագրի նախագծում այդ կետը ձևակերպվել է լռելյայն՝ նկատի ունենալով Մեծամորի ԱԷԿ-ի շահագործման օբյեկտիվ ժամկետը»,- ասել է Սարգսյանը:
Նա հավելել է, որ Եվրամիության հետ համաձայնագրում ոչ մի կետ չկա փաստաթուղթը ստորագրելուց հետո ատոմակայանի փակման մասին:
Ըստ ՀՀ ԱԳՆ պաշտոնական կայքում տեղադրված Եվրամիության հետ համապարփակ և ընդլայնված գործընկերության մասին համաձայնագրի տեքստի, ԵՄ-ի հետ գործակցությունը նախատեսում է ատոմակայանի փակում և աշխատանքի անվտանգ կասեցում, ինչպես նաև այդ նպատակով «ճանապարհային քարտեզի» կամ գործողությունների պլանի վաղ ընդունում:
Ընդ որում, համաձայնագրում նշվում է ԱԷԿ-ը նոր էներգետիկ հզորություններով փոխարինող անհրաժեշտության մասին՝ Հայաստանի էներգետիկ անվտանգության և կայուն զարգացման համար: Հայաստանի կառավարության երկարաժամկետ ծրագիրը նախատեսում է ատոմակայանի գործող էներգաբլոկի շահագործումը երկարաձգել մինչև 2027 թ. և հետագայում, աստիճանաբար, շահագործել նոր բլոկներ:
ԱԷԿ-ի շահագործման երկարաձգման ֆինանսավորումը կկատարվի ռուսական վարկի հաշվին, որը կազմում է 270 մլն դոլար և 30 մլն դոլար դրամաշնորհի: Ներկայում «Ռոսատոմ» պետական կորպորացիայի հետ գործակցության աշխատանքները շարունակվում են ատոմակայանի երկրորդ էներգաբլոկի շահագործման ժամկետը երկարաձգելու ծրագրերի իրականացման համար:
«Կարևոր է նշել, որ ԱԷԿ-ը լիովին համապատասխանում է ՄԱԳԱՏԷ-ի չափանիշներին, և դա միջազգային մասնագիտացված գործակալությունների եզրակացությունն է: Ծրագրերի և գործառույթների անվտանգության բարելավման, ինչպես նաև արդիականացման աշխատանքների ուղղությամբ ձեռնարկվում են միջոցառումներ: Այնպես որ, Մեծամորի ատոմակայանը կգործի մինչեւ 2027 թվականը: Մենք գտնում ենք, որ մեր անվտանգության և առաջին հերթին, էներգետիկ անվտանգության համար ատոմային էներգիան միշտ լինելու է Հայաստանում», — ընդգծել է Սարգսյանը:
Հայկական ԱԷԿ-ը միակն է տարածաշրջանում, գտնվում է Մեծամոր քաղաքի (Երևանից մոտ 30 կմ հարավ) մոտակայքում: Հայկական ատոմակայանի առաջին էներգաբլոկը շահագործման է հանձնվել 1976 թ. դեկտեմբերին, երկրորդը՝ 1980 թ. հունվարին: Ատոմակայանի աշխատանքը դադարեցվել էր 1989 թ. մարտին Սպիտակի 1989 թ. դեկտեմբերի 7-ի երկրաշարժից հետո, որի ժամանակ 25 հազար մարդ զոհվեց:
