ԵՐԵՎԱՆ, 1 նոյեմբերի — Sputnik. Շոգ ամառն ու ոռոգման սեզոնը վաղուց արդեն ավարտվել են։ Բայց հայաստանյան ջրամբարները մինչ օրս էլ դեռ գրեթե դատարկ են։
«Անձրևներ եկել են, բայց դա այն ծավալը չէ, որ էական ազդեցություն ունենար։ Եթե փոփոխություն էլ կա, շատ փոքր է, աննշան»,– Sputnik Արմենիային ասացին Ջրային տնտեսության պետական կոմիտեից։
Իսկ թե իրականում որքան ժամանակ կպահանջվի, որպեսզի անցած ամռանը Հայաստանում գրանցված երաշտի պայմաններում դատարկված ջրամբարները վերականգնեն իրենց նախաերաշտային ծավալը, մեր զրուցակիցը դժվարացավ պատասխանել։
Նշենք, որ պաշտոնական տվյալներով, այս պահին հայաստանյան ջրամբարների լցվածությունը շուրջ 10% է։ ԱԻՆ հրապարակման պաշտոնական տվյալների համաձայն` Ախուրյանի ջրամբարում ջրի ծավալն այս պահի դրությամբ 525 մլն խմ–ի փոխարեն 34.8 է, Արփի լճում` 105-ի փոխարեն 9.20, Ապարանի ջրամբարում` 91-ի փոխարեն 10.8, Ազատի ջրամբարում` 70-ի փոխարեն 5.9, Մարմարիկում` 24-ի փոխարեն 0.93 մլն խմ։
