ԵՐԵՎԱՆ, 31 հոկտեմբերի — Sputnik. 2018թ-ին կարող են բարձրանալ խմելու ջրի և էլեկտրաէներգիայի սակագները: Այսօր ԱԺ-ում, պատասխանելով հնարավոր թանկացումների մասին պատգամավորների հարցերին, նման հայտարարություն արեց ՀՀ ՀԾԿՀ-ի նախագահի տեղակալ Միքայել Սողոմոնյանը:
Էլեկտրաէներգիայի սակագնի կառուցվածքն ու հնարավոր փոփոխությունները, նրա խոսքով, այս պահին ուսումնասիրվում են հանձնաժողովում: Հնարավոր փոփոխությունների մասին հանձնաժողովը կհայտարարի ավելի ուշ:
Այդուհանդերձ, հանձնաժողովի ներկայացուցիչը էլեկտրաէներգիայի սակագնի թանկացումը քիչ հավանական համարեց: Փոխարենը, խմելու ջրի սակագնի բարձրացումը, նրա խոսքով, շատ ավելի հավանական է:
«Համաձայն կառավարության և «Վեոլիա ջուր» ընկերության միջև կնքված պայմանագրի` ջրի և ջրահեռացման սակագինը որոշվում է երեք հիմնական գործոններով՝ էլեկտրաէներգիայի սակագին, սղաճ և փաստացի վաճառված ջրի ծավալ»,- ասաց Սողոմոնյանը՝ միաժամանակ հավելելով, որ էլեկտրաէներգիայի սակագինն ընթացիկ տարում չի փոխվել, սղաճի ցուցանիշը շատ ցածր է սակագնի վրա ազդեցություն ունենալու համար, իսկ բնակչությանը մատակարարված ջրի ծավալների ցուցանիշը կարող է թանկացման պատճառ դառնալ:
Սողոմոնյանի խոսքով, պայմանագրով նախատեսված 123 մլն խմ ջրի փոխարեն 2017-ին բնակչությանը մատակարարվել է 113 մլն խմ: Հենց այս հիմնավորմամբ էլ ընկերությունը դիմել է ՀԾԿՀ՝ սակագինը բարձրացնելու հայցով:
Հանձնաժողովն այս պահին դեռ շարունակում է ուսումնասիրել «Վեոլիա ջուր» ընկերության հայտն ու դրանում նշված տվյալները:
«Հանձնաժողովի նպատակն է մոնիթորինգի միջոցով ճշտել այս տվյալները: Կճշտենք ու կներկայացնենք»,- ասաց Սողոմոնյանը:
Նշենք, որ Վեոլա ջուրն» առաջարկում է ջրի սակագինը բարձրացնել 14 դրամով (180 դրամից մինչև 194 դրամ)։
«Վեոլա ջուրը» ֆրանսիական Veolia-ի դուստր ընկերությունն է, որը 2006 թվականից զբաղվում է Երևանի ջրամատակարարմամբ, իսկ 2016 թվականի աշնանը հաղթել է մրցույթում, որի համաձայն՝ 2017 թվականից 15 տարով կառավարում է ամբողջ երկրի ջրամատակարարումը:
