ԵՐԵՎԱՆ, 31 հոկտեմբերի — Sputnik. 2018թ-ին հասարակական տրանսպորտը չի թանկանա, նույնիսկ եթե գազի գինը բարձրանա: Այս մասին, այսօր 2018թ-ի պետական բյուջեի նախագծի քննարկման ժամանակ հայտնեց ՊԵԿ փոխնախագահ Վախթանգ Միրումյանը:
Նա հիշեցրեց, որ նախկինում սեղմված գազի 1խմ-ը Հայաստանում վաճառվում էր 200 դրամով, հիմա՝ 170-180-ով, բայց տրանսպորտի սակագինը մնացել է անփոփոխ:
«Այսինքն, մենք հիմա ունենք 20-30 դրամի խնայողություն, հետևաբար նույն չափով թանկացումը հիմք չի տալիս ենթադրելու, որ դա կբերի հասարակական տրանսպորտի սակագնի թանկացման»,- պատասխանելով պատգամավորների հարցերին` ասաց Միրումյանը:
Նշենք, որ «Գազպրոմ» ընկերության վարչության նախագահ Ալեքսեյ Միլլերն ավելի վաղ հայտնել էր, որ 2018 թվականին Հայաստան մատակարարվող գազի գինը չի փոխվի և կպահպանվի հազար խորանարդ մետրի դիմաց 150 դոլարի մակարդակում։
ՀՀ ԱԺ-ը երեկվանից սկսել է քննարկել ՀՀ 2018թ-ի բյուջեի նախագիծը: ԱԺ մշտական հանձնաժողովներում քննարկումներն ավարտելուց հետո այն կքննարկվի խորհրդարանի նիստում:
