ԵՐԵՎԱՆ, 31 հոկտեմբերի–Sputnik. Կա մի իրավիճակ, երբ Հայաստանից անվերջ սպասում են սփյուռքահայերի փողերին, իսկ վերջիններն էլ մտավախություն ունեն, որ իրենց այստեղ խաբում են։ Լիոնում ծնված ու մեծացած Րաֆֆի Կրիկորյանը լսել է այդ ամենի մասին, բայց փորձում է չսևեռվել ու իր գործն անել։
«Մենք Հայաստան–Սփյուռք համաժողովին եկանք ու ասացինք` մի քիչ մեզ հարգեք, ի՞նչ եք մտածում, մենք այստեղ եկել ենք առանց իմանալո՞ւ, թե կեցությունն ինչպես է։ Մենք միամիտ չենք»,– ասաց Կրիկորյանը։
Հայաստանում ներդրումներ անելիս նա որոշել է հետևել բիզնեսի չոր կանոններին` մի կողմ թողնելով պատմական ռոմանտիզմը։
«Ինչպես որ աշխատում եմ մյուս երկրների հետ, նույնկերպ պետք է աշխատեմ Հայաստանի հետ, ինձ համար տարբերություն չկա։ Հիշում եմ երկրաշարժը կամ պատերազմը, բայց դա վերջացավ, բարեգործությունն էլ հետը։ Հենց բարեգործությունն է, որ մեզ սպանում է»,– ասաց Կրիկորյանը։
Բարեգործությունը բերում է մուրացկանության, կարծում է Կրիկորյանը։ Հատկապես, այն պարագայում, երբ Հայաստանում մեծանում է ֆանտաստիկ սերունդ` նորարար գաղափարներով ու նախաձեռնություններով, այդ հասկացությունը խիստ անտեղի է։
«Ապագան Հայաստանինն է, դուք տեսնում եք, թե ինչպես է երկիրը զարգանում։ Բիզնեսի համար բարենպաստ պայմաններ էլ կան, չնայած՝ չեմ կարող ասել, որ դրանք դրախտային են։ Միաժամանակ, Հայաստանն ապահով է ներդրումների համար, այս ու Արցախի բանկերը սուպեր ապահով են`ի տարբերություն եվրոպական բանկերի»,–ասաց Կրիկորյանը։
Գյուղատնտեսություն և նորագույն տեխնոլոգիաներ. սրանք են այն ուղղությունները, որոնցում իր ներդրումը կունենա նաև Կրիկորյանը։
«Երկիրը պահելու համար նախ պետք է մեր գյուղացիներին պահենք։ Երբ մեր զինվորներին ճակատ ենք ուղարկում, պետք է մտածենք, որ նրանց մեջքին մարդ է պետք ունենալ»,– ասաց Լիոնի հայազգի գործարարը։
Կրիկորյանը գիտի, որ Հայաստանում մարդիկ կան, որոնք չեն սիրում օրենքով աշխատել, սակայն նա նաև նշում է` ինչքան էլ սփյուռքահայերը պահանջեն կամ դժգոհեն իշխանությունից, պետք եղած ժամանակ 7 միլիոնանոց հայկական Սփյուռքը կարող է համախմբվել Հայաստանի անվտանգության ու զարգացման շուրջ։
