ԵՐԵՎԱՆ, 30 հոկտեմբերի — Sputnik. Վայոց Ձորի մարզի Եղեգնաձոր քաղաքի թիվ մեկ հիմնական դպրոցի շինարարական աշխատանքներն իրականացնելիս շինարարները հայտնաբերել են, նախնական գնահատմամբ, վաղ շրջանի հնածո իրեր: Այս մասին հայտնում է Հայաստանի տարածքային զարգացման հիմնադրամի լրատվական բաժինը։
Արդյունքում ժամանակավորապես դադարեցվել են շինարարական աշխատանքները:
Հիմնադրամը գրավոր դիմել է Մշակույթի նախարարությանը, որպեսզի պատկան մարմինը, համաձայն կատարված եզրակացության, համապատասխան որոշումներ կայացնի հետագա աշխատանքների բնականոն ընթացքի վերաբերյալ:
Ասիական զարգացման բանկի և ՀՀ կառավարության կնքած միջպետական համաձայնագրի շրջանակում իրականացվող Սեյսմիկ անվտանգության բարելավման ծրագրի շրջանակներում Երևանում և մարզերում նախատեսվում է կառուցել կամ վերակառուցել 46 դպրոց:
Կառավարությունն այսօր հաստատել է իրականացվող 20 ծրագրի ցանկը, որոնցից 14-ը` Երևան քաղաքում, իսկ 6-ը` մարզերում:
Այդ ծրագիրն իրականացնող կառույցը Հայաստանի տարածքային զարգացման հիմնադրամն է:
