ԵՐԵՎԱՆ, 30 հոկտեմբերի — Sputnik. Արմավիրի բնակիչների տեղեկություններով` «Մանուշակ» մանկապարտեզի աշխատակիցներին ու երեխաներին պատանդ վերցրած տղամարդու մոտ նռնակ կա։
Տեղի բնակիչների խոսքով, նա դանակահարել է իր կնոջը, որն այժմ մանկապարտեզի շենքում է։
Նշենք, որ այս առնչությամբ պաշտոնական որևէ տեղեկություն առայժմ չկա։
Արմավիրի փոխմարզպետ Գագիկ Գաբրիելյանը Sputnik Արմենիայի թղթակցի հետ զրույցում ասաց, որ վերջին տվյալներով այս պահին պատանդառուի մոտ մեկ երեխա կա, մնացածին հաջողվել է ազատել։ «Դանակով տղամարդը վնասել է իր նախկին կնոջն ու զոքանչին, բայց վնասվածքները լուրջ չեն»,–ասաց փոխմարզպետը։
Գաբրիելյանի խոսքով`տղամարդու մոտ նռնակ չկա։
Հիշեցնենք, որ որոշ տեղեկությունների համաձայն` այսօր 16։25–ին Արմավիր քաղաքի «Մանուշակ» մանկապարտեզ դանակով ներխուժած տղամարդը այդ քայլով ցանկացել է վրեժ լուծել նույն մանկապարտեզում աշխատող իր նախկին կնոջից։
Զոքանչը «Մանուշակ» մանկապարտեզի վարիչն է, իսկ նախկին կինը նույն մանկապարտեզում դաստիարակչուհի է աշխատում։
