ԵՐԵՎԱՆ, 30 հոկտեմբերի – Sputnik. Ցավում եմ, որ տանջված մարդիկ եմ տեսնում` անկախ նրանց ազգությունից: Այս մասին ասել է RT-ի և «Ռոսիա Սեգոդնյա» միջազգային լրատվական գործակալության գլխավոր խմբագիր Մարգարիտա Սիմոնյանը`պատասխանելով «Էխո Մոսկվիի» ռադիոլսողների հարցերին:
Ռուսաստան արտագնա աշխատանքի մեկնած հայերի մասին հարցը տվել է Նաթելլա անունով մոսկվացի մի բժիշկ:
«Ի՞նչ եք զգում, երբ տեսնում եք տանջված հայաստանցի միգրանտներին, որոնք Մոսկվայում քարի սալիկապատմամբ են զբաղվում և ոչ միայն քարի…. Ի՞նչ եք կարծում, կարելի է վստահել իշխանությանը, որը այդպես դավաճանում և վաճառում է սեփական ժողովրդին: Սա վերաբերում է ոչ միայն հայերին », — հարցրել է նա:
«Դառնանում եմ անցնելով« խոշտանգված» որևէ մեկի կողքով, ոչ միայն հայ միգրանտների, ընդհանրապես, եթե տեսնում եմ, որ ինչ-որ մեկը շատ տանջված է, աշխատում եմ նրա կողքով չանցնել», — պատասխանել է Սիմոնյանը:
Հայաստանի ղեկավարության վերաբերյալ հարցին RT գլխավոր խմբագիրը պատասխանել է, թե տվյալ խնդրի փորձագետ չէ:
«Ես չեմ հասկանում, թե ինչ ղեկավարության Դուք ի նկատի ունեք դավաճանում է իր ժողովրդին ասելով: Հայաստանի՞ ղեկավարությանը: Կարծում եմ` ես այդ հարցի մասնագետ չեմ, և չունեմ այս խնդրի հանդեպ անձնական վերաբերմունք: Ես Ռուսաստանի քաղաքացի եմ, իսկ ղեկավարության ընտրությունը Հայաստանի քաղաքացիների անվերապահ իրավունքն է», — ասել է նա:
Ռադիոլսողներից մեկի հարցին, թե YouTube- ում RT- ի հեռարձակումներն ուղեկցվում են հակասեմական մեկնաբանություններով, Սիմոնյանը նշել է, որ իր ելույթները «Էխոյի» կայքում, որպես կանոն, ուղեկցվում են հակահայկական մեկնաբանություններով, բայց դա ոչ մի կերպ չի նշանակում, որ ռադիոյի խմբագրական խորհրդը հակահայկական տրամադրություն ունի:
«Տեսնենք, թե այս հարցազրույցն ինչպիսի մեկնաբանություններ կունենա: Սովորաբար «Էխոյի» կայքում ներկայացված իմ ելույթները ուղեկցվում են հակահայկական մեկնաբանություններով: Բարեբախտաբար, «Էխոն» դրանց մի մասը ջնջում է, բայց հիմա էլ, եթե փնտրեք, դրանցից կգտնեք կայքում: Անշուշտ, ես դրանից ես չեմ եզրակացնում, որ «Էխոյի» խմբագրությունը հակահայկական տրամադրություն ունի», — ասել է նա:
Սիմոնյանը նաև ավելացրեց, որ RT հեռուստաալիքը YouTube- ում հաճախումների հարցով առաջատարն է համաշխարհային նորությունների ալիքների շարքում, ուստի շատ դժվար է վերահսկել ամենօրյա մեկնաբանությունների ամբողջ ծավալը:
