ԵՐԵՎԱՆ, 26 հոկտեմբերի — Sputnik. RT հեռուստաալիքի և «Ռոսիա սեգոդնյա» ՄՏԳ-ի գլխավոր խմբագիր Մարգարիտա Սիմոնյանը չէր հավատում, որ Twitter-ը կառավարում են ամերիկյան հատուկ ծառայությունները։ Այս մասին նա հայտնել է ՌԻԱ Նովոստիին` մեկնաբանելով Twitter-ում RT-ի և Sputnik-ի գովազդն արգելելու որոշումը։
Ամերիկյան սոցիալական ցանցն այսօր հայտարարել է, որ արգելափակելու է այն ալիքները, որոնք պատկանում են RT-ին ու Sputnik-ին։ Միկրոբլոգի ղեկավարությունն այս որոշումը կայացրել է` հիմք ընդունելով ԱՄՆ-ի նախագահական ընտրություններում «ռուսական միջամտությունը» քննելու գործը։
Սիմոնյանի խոսքով, այս գործողություններին կարող են հաջորդել ռուսական պատասխան քայլերը ամերիկյան ԶԼՄ-ների նկատմամբ։
«Խոստովանում եմ` ես չէի հավատում, որ Twitter-ը կառավարում են ամերիկյան հատուկ ծառայությունները։ Ինձ թվում էր` դա դավադրության տեսություն է։ Բայց Twitter-ն ինքը խոստովանեց դա։ Ցավում եմ։ Հատկապես ցավում եմ, որ ամերիկյան լրատվամիջոցներն, ամենայն հավանականությամբ, կզգան ռուսական կողմի պատասխան քայլերի ամբողջ նրբությունը»,- ասել է նա։
Սեպտեմբերի սկզբին ԱՄՆ-ի արդարադատության նախարարությունը պարտադրել է ԱՄՆ-ում RT America հեռուստաալիքին, ինչպես նաև նրա ընթացիկ գործունեությունն ու հեռուստաարտադրությունը սպասարկող ընկերությանը գրանցվել որպես արտասահմանյան գործակալ: Փաստաթուղթը ստացվել է օտարերկրյա գործակալների գրանցման պահանջները փոխելու նպատակով ԱՄՆ ներկայացուցիչների պալատի օրակարգում ներառված օրինագծի քննարկումների ֆոնին:
Նախագծով առաջարկվում է Արդարադատության նախարարությանը լրացուցիչ լիազորություններ շնորհել, որոնք թույլ կտան բացահայտել և քրեական հետապնդում իրականացնել այն կազմակերպությունների նկատմամբ, որոնք «ապօրինի կերպով» փորձում են ազդել ԱՄՆ-ում ընթացող քաղաքական գործընթացների վրա:
