ԵՐԵՎԱՆ, 26 հոկտեմբերի — Sputnik. Վերջին շրջանում խիստ անթույլատրելի բնապահպանական իրավիճակ է արձանագրվել Արարատի մարզի Այնթապ, Դարակերտ, Նորաբաց, Գետափնյա, Մասիս համայնքներում: Այս մասին այսօր կառավարության նիստի ժամանակ հայտնեց ՀՀ վարչապետ Կարեն Կարապետյանը: Նրա խոսքով՝ արձանագրվել են շրջակա միջավայրի գերաղտոտվածության դեպքեր:
«Արձանագրվել են նաև ոռոգման, կոյուղու ջրերի խառնվելու դեպքեր, որոնք լուրջ վնաս են հասցնում ինչպես շրջակա միջավայրին, այնպես էլ գյուղատնտեսությանը»,-ասաց Կարապետյանը:
Արտակարգ իրավիճակների, բնապահպանության, տարածքային կառավարման և զարգացման, գյուղատնտեսության, առողջապահության նախարարներին, ինչպես նաև ջրային տնտեսության պետական կոմիտեի նախագահին նա հանձնարարեց միջոցներ ձեռնարկել ոռոգման և կոյուղու ջրերի խառնվելու, ինչպես նաև թափոնները ոռոգման ջրատարներ թափվելու դեպքերը վերացնելու ուղղությամբ: Ըստ վարչապետի` պետք է նախատեսել նաև օրենքով սահմանված առավել խիստ պատժամիջոցներ:
Կարապետյանը հանձնարարեց նաև երկամսյա ժամկետում մշակել ու կառավարության աշխատակազմ ներկայացնել նման դեպքերը կանխելու և աղտոտման հետևանքով պատճառված վնասների փոխհատուցմանը վերաբերող օրենսդրական առաջարկություններ:
