ԵՐԵՎԱՆ, 26 հոկտեմբերի — Sputnik. Հայաստանյան հյուրանոցի ամենաթանկ համարն արժե օրական 3 մլն դրամ, Sputnik Արմենիայի հետ զրույցում ասաց վերջին 3 տարում հայաստանյան զբոսաշրջային ոլորտն ուսումնասիրած մասնագետ Վլադիմիր Հակոբյանը։ Երևանյան հյուրանոցների ստանդարտ համարների գները տատանվում են օրական 20-100, հյուրատներինը՝ 20- 50 հազար դրամի սահմաններում։ Գները մարզերում համեմատաբար ավելի էժան են, իսկ գիշերակացի կամ հանգստի ամենաէժան տարբերակն առաջարկում են մարզային փոքրիկ հյուրատները, որոնց առաջարկած ծառայություններն ուղիղ համեմատական են արժեքին։
«Եթե հյուրատանը գիշերակացն արժե 5000 դրամ, բնականաբար, ծառայությունը պետք է լինի 5000–ին համարժեք։ Այստեղ մարդիկ, հիմնականում, միայն մի գիշեր են մնում ու շարունակում իրենց ճանապարհը։ Բայց ես վստահ եմ, որ եթե մարդը վճարում է 50-100 դոլարին համարժեք, ապա ստանում է այդ գնին համապատասխան ծառայություն»,– ասում է Հակոբյանը` վստահեցնելով, որ հյուրատնային այս ծառայությունների որակը Հայաստանում գերազանցում է նույն գնով հարևան երկրներում առաջարկվող ծառայություններին։
«Օրինակ, հյուրատներ կան, որոնք զբոսաշրջիկներին առաջարկում են թթի օղի, որը նրանց շատ է գրավում։ Առաջարկում են տանտիրուհու պատրաստած ազգային ճաշատեսակներ, որը նույնպես արտասահմանցիներին շատ հետաքրքիր է»,– ասում է Հակոբյանը,– «ցանկության դեպքում հյուրը կարող է նաև սեփական ձեռքով կով կթել, և դա շատ է բարձրացնում տվյալ հյուրատան գրավչությունը»։
Ի դեպ, պաշտոնական տվյալներով, Հայաստանում շուրջ 100 նման հյուրատներ կան ՀՀ բոլոր մարզերում, բայց դրանց կողքին կան շատ ավելի մեծ հյուրանոցներ, որոնք ոչ միայն համացանցում գրանցված չեն, այլ նույնիսկ էլեկտրոնային հասցե չունեն։
Պաշտոնական տվյալներով՝ Հայաստանում շուրջ 300 հյուրանոցային ծառայություն մատուցող մեծ ու փոքր օբյեկտ կա` 5-աստղանի հյուրանոցից մինչև մասնավոր հյուրատներ։
Միայն Երևանի կենտրոնում այսօր 38 հյուրանոց է գործում։
