Մեդվեդև–Կարապետյան ու ԵԱՏՄ անդամ երկրների վարչապետների հանդիպումները Երևանում որոշակի հստակություն մտցրեցին հայաստանյան տնտեսության համար կարևոր այնպիսի հարցերում, ինչպիսիք են գազի հաջորդ տարվա սակագինը, տրանսպորտային փոխադրումների տարիֆային կարգավորումները, առևտրում առկա սահմանափակումների վերացումը։ Sputnik Արմենիայի հետ զրույցում վերլուծելով երևանյան հանդիպումների արդյունքները՝ նշեց տնտեսագետ Ատոմ Մարգարյանը։
«Հիմնականը, սակայն, ներքին շուկայում սահմանափակումների, արգելքների, անհարկի գանձումների վերացման շուրջ պայմանավորվածությունն էր»,– ասաց Մարգարյանը` հավելելով, որ հստակ ժամկետ է դրվել մինչև հաջորդ հանդիպումը քայլեր ձեռնարկել առկա խոչընդոտները վերացնելու ուղղությամբ։
Ինչ վերաբերում է գազի սակագնին, Ատոմ Մարգարյանն ընդգծեց, որ դա մեր երկրի համար չափազանց զգայուն թեմա է։
«Այն, որ գազի սակագնի պատճառով մեր արտադրողները որոշակի խնդիրներ են ունենում՝ կապված ինքնարժեքի ու արտադրանքի մրցունակության հետ, գաղտնիք չէ»,– ասաց Մարգարյանը` հիշեցնելով, որ կառավարությունն այդ խնդիրը հարթելու համար այս տարի ստիպված եղավ գազի դիմաց արտոնյալ սակագներ կիրառել որոշ ապրանքատեսակների, մասնավորապես, գյուղատնտեսական մթերք արտադրողների համար։
Ի դեպ, ըստ Մարգարյանի, նման բարձրաստիճան հանդիպումների օրակարգում Հայաստանի փորձը ողջունում են այլ երկրների ղեկավարները։
