ԵՐԵՎԱՆ, 26 հոկտեմբերի — Sputnik. Հոկտեմբերի 25-ին ժամը 10:05-ին ահազանգ է ստացվել, որ Ասկերան-Ստեփանակերտ տանող ճանապարհի 2-րդ կմ տեղի է ունեցել ավտոճանապարահին պատահար, անհրաժեշտ է փրկարարների օգնությունը:
Այս մասին տեղեկացնում է ԱՀ Արտակարգ իրավիճակների պետական ծառայությունը։
Ահազանգով դեպքի վայր են մեկնել ԱԻՊԾ Ասկերանի շրջանային արտակարգ իրավիճակների բաժնի մեկ մարտական հաշվարկ և փրկարարական ուժերի վարչության արագ արձագանքման հատուկ ստորաբաժանման հերթապահ օպերատիվ խումբը:
Պարզվել է, որ իրար են բախվել Ռ. Ս.-ի (ք. Ասկերանի բնակիչ, 1982 թ. ծն.) վարած «ВАЗ-21011» մակնիշի, Մ. Թ.-ի (Շուշիի շրջանի Քարին Տակ համայնքի բնակիչ, 1994 թ. ծն.) վարած «Միտցուբիշի» մակնիշի և Ս. Ղ.-ի (Մարտունու շրջանի Հացի համայնքի բնակիչ, 1984 թ. ծն.) վարած «ВАЗ-2106» ավտոմեքենաները:
Ճանապարհատրանսպորտային պատահարի հետևանքով «ВАЗ-21011» մակնիշի ավտոմեքենայի վարորդ Ռ. Ս.-ն և ուղևորներ Հ. Ս.-ն (ք. Ասկերանի բնակիչ, 1988 թ. ծն.), Ա. Ս.-ն (ք. Ասկերանի բնակիչ, 1966 թ. ծն.) տեղում մահացել են, իսկ Ի. Ս.-ին (ք. Ասկերանի բնակիչ, 1959 թ. ծն.) տեղում ցուցաբերել են առաջին բուժօգնություն և տեղափոխել «Հանրապետական բժշկական կենտրոն» ՓԲԸ, որտեղ վերջինս մահացել է:
«Միտցուբիշի» մակնիշի ավտոմեքենայի վարորդ Մ. Թ.-ին տարբեր աստիճանի մարմնական վնասվածքներով տեղափոխել են «Հանրապետական բժշկական կենտրոն» ՓԲԸ: Ըստ բժիշկներից ստացած տեղեկության` տուժածի վիճակը գնահատվում է բավարար:
«ВАЗ-2106» ավտոմեքենայում տուժածներ չկան:
