ԵՐԵՎԱՆ, 26 հոկտեմբերի–Sputnik. Ադրբեջանը փակուղի է մտել ու դրանից դուրս գալու ճանապարհ չունի։ Այս մասին կառավարության նիստից հետո խոսեց փոխարտգործնախարար Շավարշ Քոչարյանը` նշելով, որ խոսքը վերաբերում է այդ երկրի արտաքին ու ներքին քաղաքականությանն ու բանակցություններին։
«Բանակցությանը խանգարում է Ադրբեջանը, այնպես չէ, որ հայկական կողմը խուսափել է բանակցությունից։ Ճիշտ հակառակը` երկու հայկական կողմերը միշտ հակված են բանակցությունների։ Բայց եթե քո հակառակորդը քեզ պարտադրում է` կամ ամեն ինչ ինչպես ես եմ ուզում, կամ պատերազմ, ապա տեղիք տալ չի կարելի»,–ասաց Քոչարյանը։
Նրա խոսքով` բանակցությունների համար անհրաժեշտ է համապատասխան հիմք, իսկ դա կողմերի միջև վստահությունն է։
«Այդ վստահությունը ձեռքբերելու համար անհրաժեշտ է, որ Ադրբեջանը կատարի իր միջազգային պարտավորությունը։ Ես նորից եմ կրկնում` այն ինչ կապված է հետաքննության մեխանիզմի հետ, դա Ադրբեջանի միջազգային պարտավորությունն է։ Դեռևս 1995 թվականին ստորագրվել է եռակողմ համաձայնագիր Արցախի և Հայաստանի հետ, առ այն, որ պետք է կրակի դադարեցման ռեժիմը պահպանվի` մասնավորապես ներդնելով հետաքննության մեխանիզմները»,–ասաց Քոչարյանը։
Նա նկատեց, որ իրավիճակը հստակ տեսնում են ԵԱՀԿ Մինսկի խմբի համանախագահները։ Հատկապես ապրիլյան պատերազմից հետո, ըստ Քոչարյանի, նրանց խոսքում նկատելի է դա։
Հիշեցնենք, որ հոկտեմբերի 16–ին ԵԱՀԿ ՄԽ համանախագահների միջնորդությամբ Ժնևում կրկին բանակցային սեղանի շուրջ նստած Հայաստանի և Ադրբեջանի նախագահներ Սերժ Սարգսյանն ու Իլհամ Ալիևը պայմանավորվել էին միջոցներ ձեռնարկել բանակցային գործընթացը խորացնելու և շփման գծում լարվածության կրճատման ուղղությամբ լրացուցիչ քայլեր ձեռնարկելու վերաբերյալ:
Չնայած դրան, հոկտեմբերի 19–ին Արցախի շփման գծում հակառակորդի կրակոցից հայ զինծառայող էր զոհվել, իսկ հոկտեմբերի 23–ին` մեկ օրում 2 անգամ, ադրբեջանական զինուժը շփման գծում կիրառել է «ՍՊԱՅԿ» տիպի հակատանկային հրթիռներ։
