ԵՐԵՎԱՆ, 25 հոկտեմբերի — Sputnik. Երեկ՝ հոկտեմբերի 24-ին, խոշոր ավտովթար է տեղի ունեցել Լոռու մարզում։ Ժամը 14։30-ի սահմաններում Ալավերդի քաղաքի Ակներ թաղամասի բնակիչ՝ 41-ամյա Արման Կոնինյանն իր վարած Chevrolet Niva մակնիշի ավտոմեքենայով Սանահին-Ակներ ավտոճանապարհի 1-ին կմ հատվածում դուրս է եկել ճանապարհի երթևեկելի գոտուց և մոտ 30 մետր գլորվել ձորը։ Այս մասին հայտնում է shamshyan.com-ը։
Վթարի հետևանքով վարորդ Ա. Կոնինյանը, նրա ուղևորները՝ 39-ամյա Նարինե Հակոբյանը, 15-ամյա Անուշ Կոնինյանը, 8-ամյա Գոռ Կոնինյանը և 12-ամյա Աննա Կոնինյանը, մարմնական վնասվածքներով տեղափոխվել են Ալավերդու բժշկական կենտրոն։
Փաստի առթիվ Ճանապարհային Ոստիկանության 2-րդ սպայական գումարտակի 5-րդ վաշտի հետաքննիչի կողմից նյութեր են նախապատրաստվում։
Կայքի տեղեկություններով՝ վարորդ Ա. Կոնինյանն աշխատում է «Ալավերդի» բժշկական կենտրոնում, վիրավորներից Անուշ Կոնինյանը, Գ. Կոնինյանը և Աննա Կոնինյանը սովորում են Ալավերդու թիվ 11 դպրոցում և վարորդի երեխաներն են։
Ծանուցում.Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
