Եվրասիական հնգյակի կառավարության ղեկավարների հանդիպման օրակարգը շատ լայն է, հարցերը վերաբերում են փոխադարձ հետաքրքրություն ներկայացնող գրեթե բոլոր հարցերին` շուկաների սահմանափակումների վերացում, էլեկտրաէներգետիկ շուկայի միասնականացում, թվային օրակարգ։ Sputnik Արմենիայի հետ զրույցում, անդրադառնալով հոկտեմբերի 25-ին Երևանում նախանշված Եվրասիական միջկառավարական խորհրդի հերթական նիստի օրակարգին, ասել է տնտեսագետ Ատոմ Մարգարյանը։
«Ամենահրատապը, որ այս պահին արդեն լուծում է պահանջում, վերաբերում է ներքին շուկաների` ԵԱՏՄ օրենքներով չնախատեսված գանձումների, սահմանափակումների վերացմանը»,- ասել է Մարգարյանը` հավելելով, որ նման գործելակերպը հակասում է ԵԱՏՄ շրջանակում կնքված պայմանագրերին ու համաձայնագրերին։
«Հայաստանի դեպքում սահմանափակումը վերաբերում է էլեկտրոնային գնումներին, որտեղ բացակայում է ռուսերենով տեղեկատվությունը»,- նշել է տնտեսագետը։
Մարգարյանը ենթադրում է, որ նիստի ընթացքում կհաստատվի այն ճանապարհային քարտեզը, որի համաձայն առկա սահմանափակումները պետք է վերացվեն։
