ԵՐԵՎԱՆ, 25 հոկտեմբերի — Sputnik. Հայտնի դերասան և ռեժիսոր Արմեն Ջիգարխանյանը ոստիկանությանը հայտնել է, որ Մոսկվայի հարավ-արևմուտքում անհայտ անձինք գողացել են նրա անձնագիրը։ Այս մասին հայտնում է «Մոսկվա» քաղաքային նորությունների գործակալությունը` հղում անելով իրավապահ մարմիններին։
«Հոկտեմբերի 24-ին ոստիկանություն է դիմել Ջիգարխանյանը և հայտնել, որ հոկտեմբերի 1-10-ն ընկած ժամանակահատվածում անհայտ անձինք «Ջիգարխանյանի ղեկավարած դրամատիկական թատրոնի մոտակայքում գողացել են նրա անձնագիրը»,- հայտնել է գործակալության զրուցակիցը։
Գողության փաստի առթիվ ոստիկանությունը քրեական գործ է հարուցել հոկտեմբերի 24-ին։
Ավելի վաղ հայտնի էր դարձել, որ Ջիգարխանյանը դատական հայց է ներկայացրել ` պահանջելով, որ դադարեցնեն իր ամուսնությունը Վիտալինա Ցիմբալյուկ-Ռոմանովսկայայի հետ։
Դերասանն Առաջին ալիքի «Թող խոսեն» ծրագրի եթերում ասել էր, որ ուզում է ամուսնալուծվել, քանի որ Վիտալինան նրան «շատ ցավ» է պատճառել:
Ջիգարխանյանը հոկտեմբերի 10-ին հայտնվել էր Մոսկվայի 57-րդ քաղաքային հիվանդանոցում, որտեղ մնաց ավելի քան տասը օր: Հիվանդանոցում նա ասել էր, որ չգիտի, թե հետո ուր է գնալու, քանի որ ամբողջ ունեցվածքը կնոջ անունով է գրանցված:
