ԵՐԵՎԱՆ, 24 հոկտեմբերի — Sputnik. Հայտնի դերասան և ժողովրդական արտիստ Արմեն Ջիգարխանյանն ամուսնալուծության դիմում է գրել: Դերասանը պահել է իր խոստումը և դիմել է դատարան` կնոջ հետ հարաբերությունները դադարեցնելու համար:
Այս մասին տեղեկությունը հրապարակվել է Մոսկվայի հաշտարար դատավորների միասնական տեղեկատվական տարածքի կայքում:
Ավելի վաղ Ջիգարխանյանն Առաջին ալիքի «Թող խոսեն» ծրագրի եթերում հաստատել էր, որ մտադիր է ամուսնալուծվել իր կնոջ` Վիտալինա Ցիմբալյուկ-Ռոմանովսկայայի հետ: Նա ասել էր, որ Վիտալինան նրան «շատ ցավ» է պատճառել:
Դերասանի ընկեր Արթուր Սողոմոնյանն էլ հայտնել էր, որ դերասանը խնդրել է դռնփակ նիստ անցկացնել։ Գույքի բաժանման հարցը կլուծվի առանձին: Ըստ նրա` Ջիգարխանյանի կինն «ամեն ինչ տարել է նրանից»:
Ջիգարխանյանը հոկտեմբերի 10-ին հայտնվել էր Մոսկվայի 57-րդ քաղաքային հիվանդանոցում, որտեղ մնաց ավելի քան տասը օր: Հիվանդանոցում նա ասել էր, որ չգիտի, թե հետո ուր է գնալու, քանի որ ամբողջ ունեցվածքը կնոջ անունով է գրանցված: Դերասանը պատմել էր, որ ընկերներն իրեն աջակցում են:
