ԵՐԵՎԱՆ, 24 հոկտեմբերի — Sputnik. Հայտնի դերասան, ԽՍՀՄ արտիստ Արմեն Ջիգարխանյանը ռուսական Առաջին ալիքի «Պուստ գովորյատ» հեռուստահաղորդման եթերում հաստատել է, որ մտադիր է ամուսնալուծվել։
«Ես ընտրություն չունեմ, դժբախտ եմ։ Մեր մեջ մեծ տարիքային տարբերություն կար` 50 տարի։ Դա արդեն գրեթե ողբերգություն է, սակայն մենք ընդառաջ գնացինք միմյանց, ուզում էինք միասին լինել։ Չեմ հրաժարվում իմ ոչ մի որոշումից, սակայն եթե մարդը գող է, իսկ ես պնդում եմ այդ փաստը… Պարզվում է, որ ինձ թալանել են։ Ես տանը չհրկիզվող պահարան ունեի, այժմ այն չկա», – ասել է Ջիգարխանյանը։
Դերասանը շատ զուսպ էր և ներանձնական հարցերին պատասխանում էր այսպես`«խնդրում եմ իմ անձնական կյանքին մի խառնվեք»։
Այն հարցին, թե արդյո՞ք զղջում է, որ ժամանակին այդ կինը (Վիտալինան) իր կողքին է եղել, բոլորի կողմից սիրված դերասանն ասաց. «Հրաժարվում եմ պատասխանել այդ հարցին, ես դեռ ամենաքիչը հինգ տարի կապրեմ, այդժամ գուցե, հարգելով Ձեզ, պատասխանեմ այդ հարցին»։
Դերասանը սահմանափակվել է միայն ասելով` ես նրանից շատ հարվածներ եմ ստացել։
Նա հրաժարվել է նաև առաջարկվող իրավաբանական օգնությունից` ասելով, որ ամեն ինչ կորոշի դատարանը։
Ջիգարխանյանը նշել է, որ իր համար այժմ ամենակարևորը թատրոնի աշխատանքը կարգավորելն է, այն թատրոնի, որն իր անունն է կրում։ Մասնավորապես, նա մտադիր է փոխել խաղացանկը։
«Դերասաններին շատ բան ունեմ ասելու, բայց միևնույն ժամանակ չեմ ցանկանում, որ այս պատմությունը նրանցից և որևէ մեկին վնասի… Չեմ ցանկանում խղճուկ խոսակցություններ լսել», – ասել է Ջիգարխանյանը։
Նա նշել է, որ որևէ բանից չի վախենում, քանի որ թատրոնին նվիրված և սիրահարված մարդ է։
