ԵՐԵՎԱՆ, 24 հոկտեմբերի — Sputnik. Գինու խաղողն այս տարի վաճառվել է ռեկորդային բարձր գնով, երեքշաբթի կայացած ասուլիսի ժամանակ ասաց Հայաստանի խաղողագործների միության նախագահ Ավագ Հարությունյանը։
«Բացառիկ բարձր գնով մթերվեց գինու խաղողը, Արենիում այն հասավ մինչև 350 դրամի սև արենի սորտի համար, իսկ 400 դրամից էլ ավելի՝ սպիտակ տեսակի համար, որը ռեկորդային գին էր տարածաշրջանում»,- ասաց Հարությունյանը:
Նրա խոսքով, գինու խաղողի պակաս է զգացվել. Արարատի մարզում «կախեթի» սորտի գինը հասել է 200 դրամի, այն դեպքում, որ անցյալ տարի այն կազմել է 160-170 դրամ։
Հարությունյանն ավելացրեց, որ վերջին հինգ տարում խաղողի մթերումների ծավալները կազմել են 70-90 հազար տոննա, այն դեպքում, որ պաշտոնական վիճակագրության մեջ 150-220 հազար տոննա է նշված։
«Այս տարի բերքի ծավալները եղանակային պայմանների պատճառով նվազել են 20 տոկոսով, թեև կանխատեսվում էր 30-35 տոկոս կրճատում»,- ընդգծեց նա։
Հարությունյանը նշեց, որ այս տարի գյուղացիները ֆինանսական որևէ խնդիր չեն ունեցել մթերող ընկերությունների հետ։
«Գումարների մեծ մասը միանգամից վճարվել է ։ Պայմանագրերի ժամկետները պահպանվել են»,- ասաց Հարությունյանը։
Նա ցավով նշեց, որ ցածր գին է առաջարկվել կոնյակի խաղողի համար։
«Ցածր բերքատվության ֆոնին բարձր գին չառաջարկվեց կոնյակի խաղողի համար, գործեց նույն ստվերային մեխանիզմը, որը գործել էր նախորդ տարիներին: Կառավարությունն ազնվություն ունեցավ դեմն առնելու, բայց ուժ չունեցավ»,- ասաց Հարությունյանը։
Նա ընդգծեց, որ այս ոլորտում պետք է խիստ վերահսկողություն իրականացվի։
