ԵՐԵՎԱՆ, 23 հոկտեմբերի — Sputnik. Հայաստանի տարածքում քուրդ զինյալներ է «գտել» Թուրքիայում գործող «Ընդդեմ անհիմն հայկական պնդումների» թուրքական ծայրահեղ ազգայնական կազմակերպության նախագահ Գյոքսել Գյուլբեյը։ Այս մասին գրում է թուրքական Milliyet թերթը։
«Քրդական աշխատավորական կուսակցությունը» (ՔԱԿ), Հայաստանում վերսկսելով իր ճամբարների գործունեությունը, ապահովում է Թուրքիայից և Եվրոպայից ժամանած երիտասարդներին, նրանց ուսում տալիս Ղազախստանի համալսարանի օտար լեզուների ֆակուլտետում», — ասել է Գյուլբեյը:
Նա պնդում է, որ Հայաստանը կարևոր նշանակություն ունի ՔԱԿ–ի համար, որի ճամբարները իբրև թե գործում են Գյումրիում, Սպիտակում, Երևանում և Արցախում։
Գյուլբեյի խոսքով` Հայաստանում ՔԱԿ–ին ամենից շատ աջակցում է «Դաշնակցություն» կուսակցությունը։ Բացի Հայաստանից, որը ծառայում է որպես «փոխաբեռնման կետ», Քրդական աշխատավորական կուսակցությանը (ՔԱԿ) Եվրոպայից, Իրանից, Իրաքից և Սիրիայից վարձկաններով համալրելու համար, քրդերին աջակցում են նաև Վրաստանում ու Ղազախստանում:
Նա կարծում է, որ Վրաստանում գործող մի շարք քրդական կազմակերպություններ վերահսկվում են հենց Քրդստանի աշխատավորական կուսակցության կողմից։
Իր էքսցենտրիկ և անհեթեթ հայտարարություններով Գյուլբեյը վաղուց է հայտնի։ Նրա ամենահայտնի հայտարարությունն էր` Հայաստանը Արցախի պատերազմում 8 հազար աֆղան վարձկան է ներգրավել։
Ավելի ուշ նա կոչ էր արել, որպեսզի Արցախ այցելած Թուրքիայի քաղաքացիներ Ուֆուք Ուրասը, Ալի Բայրամօղլուն, Սաիդ Չեքինօղլուն և Էրոլ Քաթիրչիօղլուն Ադրբեջանին հանձնվեն և քրեական պատասխանատվության ենթարկվեն։
Բացի այդ, Գյուլբեյը հայտարարել էր, որ Հայաստանի լոբիստական կազմակերպությունները մտադիր են Եվրոպայում բնակվող համշենահայերի համայնք ստեղծել և պայքարեն, որպեսզի նրանք վերադառնան Թուրքիայի սևծովյան ափերը։
«Ընդդեմ անհիմն հայկական պնդումների» կազմակերպությունը պարբերաբար հանդես է գալիս հակահայկական հայտարարություններով, սակայն չի սահմանափակվում խոսքով։ Նրանք բազմաթիվ ակցիաներ, միջոցառումներ և ցույցեր են կազմակերպում, օրինակ`այրում են Հայաստանի նախագահի դիմանկարները, հայ-թուրքական բախումներ է բեմադրում, ինչպես նաև արդեն երկար տարիներ փորձում են խաթարել Աղթամարի կղզու Սուրբ Խաչ եկեղեցու ամենամյա պատարագները։ Այս կազմակերպությունում Հայոց ցեղասպանության ճանաչման դեմ պայքարը սահուն կերպով անցավ էթնիկ հայերի և Հայաստանի նկատմամբ ատելության սերմանմանը:
