ԵՐԵՎԱՆ, 23 հոկտեմբերի — Sputnik. Իրանցի և հայ գործարարների համար կրկնակի հարկումը բացառելու հարցում երկու երկրի կառավարությունները պայմանավորվել և համապատասխան համաձայնագիր են ստորագրել 2017թ-ի ապրիլին, որն իրավական ուժ է ստացել, բայց լիարժեք չի գործում։ Այսօր Երևանում ՀՀ ՊԵԿ նախագահի հետ հանդիպմանը հայտնեց Իրանի հարկային ծառայության նախագահ, ֆինանսների և էկոնոմիկայի փոխնախարար Նաղաթի Նեժաթը` նշելով, որ Հայաստանի հետ աշխատող իրանցի գործարարներից որոշակի դժգոհություններ են ստանում։
Իրանցի պաշտոնյան հայ պաշտոնակցին առաջարկեց աշխատանքային խումբ ստեղծել` առկա խնդիրները բացահայտելու և բացառելու համար։ Արձագանքը չուշացավ։ ՊԵԿ նախագահ Վարդան Հարությունյանը տեղում բանավոր հանձնարարական տվեց` նշանակելով խմբի ղեկավարին ու անդամներին։ Հարությունյանը խոստացավ այսուհետև առավել ուշադիր լինել Իրանից ժամանած գործարարներին իրավունքները պարզաբանելու հարցում։
«Մենք պետք է մաքսիմալ թափանցիկ լինենք և լինենք մեր իրանցի գործարարների կողքին, և պարոն Նեժաթին պետք է խնդրեմ ու առաջարկեմ, որ մեր հայ գործարարներին էլ աջակցություն ցուցաբերեն մեր իրանցի գործընկերները, քանի որ մեր օրենսդրությունները տարբեր են, մեր և իրանցի գործարարները հաճախակի բախվում են խնդիրների, որոնք կարելի է շատ օպերատիվ լուծել, եթե հնարավորություն ունենան ավելի սերտ համագործակցելու հարկային մարմինների հետ»,- ասաց Հարությունյանը։
Իսկ սերտ համագործակցության համար նա առաջարկեց փոխանակել երկու երկրի էլեկտրոնային բազաների տվյալները, ինչին համաձայնեց նաև իրանական կողմը։ Հանդիպման ավարտին բանավոր ասված ցանկություններն արձանագրվեցին ևս մեկ համաձայնագրով։
Հայ և իրանցի պաշտոնյաները վերաստորագրեցին ու արդիականացրին Հայաստանի և Իրանի միջև կրկնակի հարկումը բացառող համաձայնագիրը։
2017թ-ի հունվար-օգոստոս ամիսներին արտահանումը Հայաստանից Իրան աճել է 11,2 տոկոսով, ներմուծումը` 9,1 տոկոսով։ Իրանից Հայաստան է ներմուծվում շուրջ 300 անուն ապրանք, որոնց մեջ ամենամեծ կշիռը` շուրջ 40%-ն ունի բնական գազը, դրան հաջորդում են նավթն ու նավթամթերքը, ապակին, պարարտանյութերը։
Իրանական գազի դիմաց Հայաստանը վճարում է էլեկտրաէներգիայով, որն էլ իր հերթին Հայաստանից Իրան արտահանվող ամենամեծ ծավալն ունեցող ապրանքն է (շուրջ 90%) ։ Հայաստանից արտահանումների երկրորդ տեղում է անմշակ ալյումինը, մետաղի ջարդոնը, ապա` ոչխարի ու այծի միսը։
