ԵՐԵՎԱՆ, 22 հոկտեմբերի-Sputnik. Հավատքով ու ինքնությամբ Թուրքիայում ամենաազատն ենք ապրում, Թուրքիայի խորհրդարանի հայազգի պատգամավոր Մարգար Եսայանը թվիթերյան էջում այդպիսի գրառում է կատարել, որն էլ բուռն քննարկումների տեղիք է տվել:
«Մեծ հաջողություն է, որ ծնվել ենք Թուրքիայում: Վստահեցնում եմ՝ որպես քրիստոնյա, որ մեր հավատքով ու ինքնությամբ ամենաազատն ենք ապրում Թուրքիայում»,- գրել է Եսայանը:
Այս գրառումը բուռն քննարկումներ է առաջացրել ինչպես քրիստոնյաների, այնպես էլ մուսուլմանների մեջ:
Օրինակ՝ օգտատերերից մեկը գրել է, որ լավագույն կրոնն իսլամն է, և իրականում, իրենք ոչ էլ հանդուրժող են:
«Երեկ և այսօր մարդկության կենտրոնը Թուրքիան է»,- գրել է Մեհմեդ անունով օգտատերը:
Մյուսներն էլ նրան մեղադրել են ծախված լինելու մեջ:
«Ոչ քո ղեկավար Էրդողանը կապ ունի իսլամի հետ, ոչ էլ դու կապ ունես քրիստոնեության ու Աստվածաշնչի հետ: Այդ քանի՞ լիրայով ես գրել այս խոսքերը»,- գրել է օգտատերերից մեկը:
Ընդհանուր առմամբ, քրիստոնյաների շրջանում Մարգար Եսայանի գրառումը բացասական արձագանք է գտել, հատկապես, երբ քրիստոնեական կառույցները՝ եկեղեցիները, շարունակում են վաճառվել ու քանդվել եսայանական Թուրքիայում:
