Ցանկացած պատվաստումից առաջ երեխան պետք է պարտադիր բուժզննում անցնի, նոր միայն թույլ տրվի պատվաստում իրականացնել։ Այդ մասին Sputnik Արմենայի հետ զրույցում ասաց ԵՊԲՀ համաճարակաբանության ավագ դասախոս Արման Բադալյանը։
Ինչ վերաբերում է պապիլոմա վիրուսի դեմ կառավարության առաջարկով ներդրվող պատվաստման համակարգին, Բադալյանը նշեց, որ թեև պատվաստումը նախատեսված է 9-14 տարեկան աղջիկների համար, բայց առաջին փուլում կպատվաստվեն 13 տարեկանները։
«Մենք ամենայն հավանականությամբ կընտրենք 13 տարեկանների խումբը՝ որպես սեռական հասունացմանն ամենամոտ տարիք»,- ասաց մասնագետը։
Ի դեպ, նրա խոսքով, այս տարիքի երեխաների պատվաստման դեպքում երբեմն լինում են ուշագնացության դեպքեր, ինչն օրգանիզմի պսիխոսոմատիկ ռեակցիայի արտահայտությունն է։ Եթե փոքր տարիքում երեխան լաց է լինում, ապա այս տարիքում լացը զսպելը հանգեցնում է ուշագնացության։ Բայց դա, Արման Բադալյանի խոսքով, այն վտանգավոր ազդեցությունը չէ, որի համար արժե հրաժարվել պատվաստման ծրագրից։ Արդյունքը, նրա համոզմամբ, շատ ավելի դրական է լինելու։
