ԵՐԵՎԱՆ, 21 հոկտեմբերի — Sputnik, Արմենուհի Մխոյան. Գյումրեցիները դեմ են ամեն տեսակի բռնություններին, բայց վստահ են՝ «Ընտանեկան բռնության կանխարգելման և ընտանեկան բռնության ենթարկված անձանց պաշտպանության մասին» օրենքը ոչ թե կօգնի, այլ կքայքայի հայի ընտանիքը:
«Մեր մեծերն են ասել ՝ ապտակով մեծացած երեխան ապագա կունենա, հիմա այս օրենքն ընդունելու դեպքում, եվրոպական օրենքները բերելով` մենք կկորցնենք այն սուրբ բանը, որ ունենք՝ ընտանիքը: Մեր նամուսով հայոց օջախը ինչո՞ւ են ուզում քայքայել»,- Sputnik Արմենիային ասաց գյումրեցի Միշա Մանուկյանը:
Մասնագետների կարծիքով, Հայաստանում ոչ թե ավելացել է ընտանեկան բռնության դեպքերի թիվը, այլ պարզապես երևույթի մասին են սկսել ավելի շատ խոսել: Բռնության ենթարկվածներն այսօր չեն ամաչում դիմել իրավապահ մարմիններին. գուցե անհավանական թվա, բայց վերջերս Գյումրիում նույնիսկ ամուսինն էր դիմել՝ կնոջ կողմից բռնության ենթարկվելու փաստով:
«Ընտանիքներում խնդիրներ շատ կան, բայց հարց է՝ օրենքն ընդունելու դեպքում այն օգուտ կբերի, թե ոչ, և արդյո՞ք Հայաստանում առկա խնդիրները կլուծվեն։ Սա այն դեպքն է, երբ պետք է ոչ թե որպես գյումրեցի, այլ որպես քաղաքացի մտածել, իսկ այդ դեպքում պարզ է մի բան, որ նման կարգավորումների անհրաժեշտություն կա»,- ասաց երիտասարդ մի տղամարդ:
Sputnik Արմենիայի կատարած հարցման մասնակիցներից օրենքին կողմ արտահայտվեցին հիմնականանում երիտասարդներն ու կանայք, բայց նրանք էլ իրենց մտավախություններն ունեին։
«Անշուշտ, օրենքը պետք է, բայց պետք է այնպես անել, որ օրենքը ճիշտ գործի հատկապես երեխաների հարցում»,- ասաց Գրետան։
Հետաքրքիր էր նաև գյումրեցի տարեց տղամարդկանց տեսակետը։
«Նախ պետք է հստակ ձևակերպել` որն է բռնությունը։ Եթե ծնողը դաստիարակչական թեթև ապտակ է տալիս, բռնություն չի կարելի համարել, իսկ երբ ամուսինն է կնոջը խփում, բռնություն է, ու այս օրենքը պետք է»,- Sputnik Արմենիային ասաց տարեց մի տղամարդ։
Շիրակի մարզում տարբեր խնդիրներով պայմանավորված ընտանեկան վեճերը շատ են՝ դրանցից բխող ընտանեկան բռնության դեպքերով: Օրինագծի ընդունման պարագայում ևս դժվար է վստահ ասել, որ այդ խնդիրը հատկապես Գյումրիում լուծում կստանա, որովհետև գյումրեցիները հնուց ի վեր ապրում են «իրենց» օրենքներով:
Նշենք, որ «Ընտանեկան բռնության կանխարգելման և ընտանեկան բռնության ենթարկված անձանց պաշտպանության մասին» օրենքի նախագծի հեղինակը ՀՀ արդարադատության նախարարությունն է։ Նախագիծն առայժմ քննարկվում է Ազգային ժողովում։
