ԵՐԵՎԱՆ, 17 հոկտեմբերի — Sputnik. Ազգային ժողովում, «Ընտանեկան բռնության կանխարգելման և ընտանեկան բռնության ենթարկված անձանց պաշտպանության մասին» օրենքի անհրաժեշտությունը նախագծի հեղինակ ՀՀ արդարադատության նախարարությունը հիմնավորում է նրանով, որ գործող ո՛չ ընտանեկան, ո՛չ էլ քրեական օրենսգրքերով չեն ապահովվում բռնությունները կանխելու միջոցները, իրավապահներն ընտանիքում կատարվողը որպես հանցանք են դիտարկում միայն այն ժամանակ, երբ արդեն տեղի է ունեցել անուղղելին։
Այսօր ԱԺ–ում օրենքի նախագծի շուրջ քննարկման ժամանակ նման մեկնաբանություն ներկայացրեց հիմնական զեկուցող, արդարադատության փոխնախարար Վիգեն Քոչարյանը։ Հասարակական մի շարք կառույցների ներկայացուցիչներն ու քննարկմանը մասնակից խորհրդարանականները, սակայն, օրենքի նախագծով ոգևորված չեն։
Նրանք համոզված են` օրենքի ընդունումը Հայաստանին պարտադրվել է ԵՄ–ի կողմից, իշխանությունները դրանում ունեն առայժմ չբացահայտված նյութական շահ։
Ի դեպ, այս պահանջը Հայաստանի դիմաց եվրոպական կառույցների կողմից դրվել է դեռ 10 տարի առաջ։ 2009թ–ին մեր երկրում նույնիսկ օրենքի նախագիծ էր մշակվել։ Բայց օրենքի ընդունման համար սահմանված ժամկետը 2014թ–ին ավարտվել էր, նախագիծն էլ` մոռացվել։
Այն որ նոր օրինագիծը մշակվել ու շրջանառության մեջ է դրվել դարձյալ արտաքին պարտադրանքի արդյունքում, պետական կառույցները հերքում են։ Հասարակական կազմակերպությունները, սակայն, հիշեցնում են, որ տարիներ առաջ նույն բարեփոխումների դիմաց ԵՄ–ը Հայաստանին կլորիկ գումար էր խոստանում։
Արդարադատության փոխնախարար Վիգեն Քոչարյանը նման պնդումներն անհիմն է համարում, բայց և չի ժխտում, որ ընտանեկան բռնության կանխարգելման բնագավառում աշխատող կառույցները պետք է ֆինանսավորում ստանան, այդ թվում նաև` արտաքին աղբյուրներից։
«Եթե պետությունն այս կամ այն քայլերը ձեռնարկում է, դա նախատեսում է նաև որոշակի ծախսեր, և այս հարցում համապատասխան աջակցություն էր նախատեսվում ԵՄ–ի կողմից։ Բայց մենք այդ ժամկետը բաց թողեցինք և հիմա այդ դրույթը չի գործում»,– մեկնաբանեց փոխնախարարը։
«Փաստորեն, մենք ուղղակի կաշառք ենք ստանում այն բանի դիմաց, որ մեր երկրում օրենք ընդունենք»,– անդրադառնալով նույն հարցին` ասաց «Միջազգային հումանիտար զարգացման» ՀԿ նախագահ Արման Ղուկասյանը։
Ինչ վերաբերում է օրինագծի անհրաժեշտության մասին պնդումներին, Արման Ղուկասյանը դրանց հակադարձում է պաշտոնական վիճակագրության թվերով։ Ըստ նրա, 2012թ–ին Հայաստանում գրանցվել է ընտանեկան բռնության 766 դեպք, որը հանցագործությունների ընդհանուր թվի ընդամենը 0.025%-ն է։
Պաշտոնական վիճակագրություն ներկայացրեց նաև ՀՀ ոստիկանության քրեական հետախուզության գլխավոր վարչության անչափահասների իրավունքների պաշտպանության և ընտանեկան բռնության դեմ պայքարի վարչության պետ, գնդապետ Նելլի Դուրյանը։ 2016 գրանցված ընտանեկան բռնության դեպքերից 481–ում ամուսինն է բռնություն կիրառել կնոջ նկատմամբ, 20 դեպքում` կինն` ամուսնու, 66 դեպքում էլ ծնողները բռնացել են զավակների նկատմամբ։
