ԵՐԵՎԱՆ, 20 հոկտեմբերի — Sputnik, Գոհար Սարգսյան. Սկեպտիկ որոշ գիտնականներ միանշանակ բացառում են այլմոլորակայինների գոյությունը` այն անվանելով իդեա ֆիքս, բայց գիտնականներից շատերն էլ շարունակում են հավատալ արտերկրային քաղաքակրթությանն ու կյանք են փնտրում այլ մոլորակներում։ Բյուրականի աստղադիտարանի տնօրեն Արեգ Միքայելյանը Sputnik Արմենիայի հետ զրույցում պատմեց` ժամանակին գիտնականները մտածում էին, որ այլմոլորակայինների հետ պետք է կապ ստեղծել, ու այդ նպատակով աստղագետները ռադիոազդանշաններ էին ուղարկում կամ փորձում էին պատասխան որսալ։ Նրանք անհաջողության մատնվեցին։
«Միայն 80-ականների վերջին աստղագետները փոխեցին իրենց ռազմավարությունը և սկսեցին այլ աստղերի շուրջ մոլորակներ որոնել։ Եվ հիմա մենք դրանց կոչում ենք արտարեգակնային մոլորակներ։ Այդ ոլորտն աստղագիտության մեջ ամենազարգացածներից մեկն է, ամենաշատը հենց դրանով են զբաղվում աստղագետները»,- ասաց նա։
Գիտնականներն արդեն իսկ հայտնաբերել են 3600 մոլորակ, որոնց վրա ուզում են կյանք գտնել, բայց դրա համար պետք են շատ զգայուն սարքեր, մանրակրկիտ հետազոտություններ։ Գիտնականներին առայժմ հաջողվել է մթնոլորտների բաղադրությունը որոշել, տեսնել, թե որտեղ թթվածին ու ջուր կա, որ պոտենցիալ կյանք կարող է պարունակել։
«Հիմա մոլորակներ կան, որոնք շատ նման են երկրին, մոտ են իրենց պարամետրերով, և հնարավոր է` այնտեղ կյանք լինի»,- ասաց նա։
Իսկ թռչող ափսեների գոյությունը Միքայելյանն անլուրջ է համարում` ասելով, որ ինչ անհայտ բան տեսնում ենք, թռչող ափսե ենք կոչում, իսկ դրանց մի մասը մթնոլորտային երևույթներն են։ Մի մասն էլ մոլորակներ են, որոնք որոշակի լուսավորության տակ տարօրինակ տպավորություն են թողնում։ Եղել է դեպք, երբ թռչունների երամն են շփոթել թռչող ափսեների հետ։
«Բայց պետք է խոստովանենք, որ ամեն ինչ չէ, որ մենք բացատրում ենք։ Բազմաթիվ դեպքեր կան, որ հասկանալի չէ` ինչ են, ո՛չ բնության երևույթ են, ո՛չ տեխնիկական միջոց»,- ասաց Միքայելյանը։
Արեգ Միքայելյանը մի հետաքրքիր տեղեկություն տվեց` կա տեսություն, որ կյանքը տարբեր տեսակի տիեզերական մարմինների կողմից տարածվում է տիեզերքում։ Այսինքն` եթե մի տեղ կյանք կա, կարող է նաև այլ տեղերում կյանք հարուցվել։ Այլ կերպ ասած` միկրոօրգանիզմները կարող են նաև ճանապարհորդել տիեզերքում։
«Կյանքի տարածվածությունը տիեզերքում համարյա կասկած չի առաջացնում»,-ասաց աստղագետը։
Ի դեպ, այլմոլորակայիններին հավատալը նաև մարդու մտածելակերպի ու երևակայության արգասիք է։ Այսօր Հայաստանում հնագետներն անցկացնում են փաստագրումներ և ժայռապատկերների վրա հայտնաբերում միստիկ էակներ։ Նրանք այժմ խուսափում են դրանց տալ այլմոլորակայինի անուն։ Բայց չեն էլ հերքում, որ գուցե նախնադարի մարդը տեսել է էակների, որոնք իրեն նման չեն` դրանք պատկերելով ժայռերի վրա։
