ԵՐԵՎԱՆ, 20 հոկտեմբերի — Sputnik. Կարմիր գրքում գրանցված հազվադեպ թռչունների՝ սպիտակագլուխ անգղերի որսի մասին վկայող լուսանկարների հարցը փակված է։ Դրանցում պատկերված անձինք պատասխնատվության չեն ենթարկվի։ Այս մասին Sputnik Արմենիային հայտնեցին ՀՀ ոստիկանության հասարակայնության հետ կապերի և լրատվության վարչությունից։
Որսագողության այս դեպքով քրեական գործի հարուցումը մերժվել է ՀՀ քրեական դատավարության օրենսգրքի 35 հոդվածի 1-ին մասի 6-րդ կետով. ասաց մեր զրուցակիցը։
Նշենք, որ հիշյալ հոդվածով քրեական գործ չի կարող հարուցվել և քրեական հետապնդում չի կարող իրականացվել, եթե «անցել են վաղեմության ժամկետները»։
Հիշեցնենք, ավելի վաղ ՀՀ ոստիկանությունը հայտարարել էր, որ պարզել են լուսանկարում երեք անձանցից երկուսի ինքնությունը։ Նրանցից մեկը Արմավիրի մարզի Շենավան գյուղի գյուղապետ Արթուր Մկրտչյանն է։ Գյուղապետը Sputnik Արմենիային ասել էր, որ հրավիրվել է ոստիկանություն՝ բացատրություն տալու։
Պարզվել է նաև, որ լուսանկարներն արված են առնվազն 4 տարի առաջ։ «Նկարներում երևացող մեքենայի համարանիշը 02.08.2013 թվականին հանձնվել է, և այլ տրանսպորտային միջոցի չի տրամադրվել, իսկ նկարում երևացող ավտոմեքենայի վրա տեղադրվել է հաշվառման այլ համարանիշ: Հետևաբար, դեպքը 2013 թվականից հետո տեղի ունենալ չէր կարող»,- հայտարարել էր ոստիկանությունը։
