ԵՐԵՎԱՆ, 19 հոկտեմբերի — Sputnik. Սեյսմիկ պաշտպանության ծառայության (ՍՊԾ) սեյսմոլոգիական ցանցի կողմից հոկտեմբերի 12-18-ը գրանցված երկրաշարժերից 9-ի համար որոշվել են օջախի հիմնական պարամետրերը:
Տեղի ունեցած սեյսմիկ իրադարձություններից 3-ը գտնվում են Հայաստանի Հանրապետության տարածքում՝ հոկտեմբերի 12-ին, ժամը 04:00-ին, Քարվաճառ քաղաքից 14 կմ դեպի հյուսիս-արևմուտք, հոկտեմբերի 14-ին, ժամը 02:12-ին, Աշոցք գյուղից 11 կմ դեպի հյուսիս-արևմուտք, հոկտեմբերի 15-ին, ժամը 09:37-ին, Գյումրի քաղաքից 34 կմ դեպի հարավ-արևմուտք:
«ՍՊԾ» գործակալությունից հայտնում են, որ տարածաշրջանում. 3 բալ և ավելի ուժգնությամբ գրանցվել է 2 երկրաշարժ: Հոկտեմբերի 14-ին Թուրքիայում` Արդահան քաղաքից 20 կմ դեպի հյուսիս-արևմուտք գտնվող էպիկենտրոնով ստորգետնյա ցնցման ուժգնությունն էր 3 բալ (2.3 մագնիտուդ):
Հաջորդ օրը տեղի է ունեցել 4 բալ (3.2 մագնիտուդ) ուժգնությամբ երկրաշարժ Ադրբեջանի Մինգեչաուր քաղաքից 13 կմ դեպի հարավ-արևմուտք:
Տարածաշրջանից դուրս 6.0 մագնիտուդով երկրաշարժ է գրանցվել հոկտեմբերի 18-ին Պոլինեզիայում` Տոնգա կղզիների տարածքում, որի հետևանքով զոհեր և ավերածություններ չկան:
