ԵՐԵՎԱՆ, 19 հոկտեմբերի — Sputnik. Ռուսաստանցի հայ գործարար Լևոն Հայրապետյանի հոգեհանգստի արարողությունը կկայանա վաղը՝ հոկտեմբերի 20-ին, Մոսկվայի հայկական սուրբ Պայծառակերպության մայր եկեղեցում։ Այդ մասին հայտնում է «Ռուսաստանի Ջավախքյան Սփյուռք» հասարակական կազմակերպության նախագահ Աղասի Արաբյանը։
Հուղարկավորությունը տեղի կունենա հոկտեմբերի 21-ին Մոսկվայի հայկական գերեզմանատանը, որտեղ թաղված են հայ գործարարի ծնողները։
Նշենք, որ դա հայազգի բարերարի վերջին ցանկությունն էր։ Այդ մասին Լևոն Հայրապետյանի մահվան օրը հայտնել էր Մոսկվայում բնակվող հայ լրագրող Վահե Ավանեսյանը։
«Նրա վերջին ցանկությունն էր, որ իրեն հուղարկավորեն ծնողների մոտ»,– իր ֆեյսբուքյան էջում գրել էր Ավանեսյանը:
Հիշեցնենք, որ Լևոն Հայրապետյանը ծանր հիվանդությունից հետո 68 տարեկանում մահացավ անազատության մեջ։
2014 թվականին Լևոն Հայրապետյանը ձերբակալվել էր ու դատապարտվել 4 տարվա ազատազրկման:
Նրա նկատմամբ հարուցված քրեական գործի հիմքում նախկին սենատոր Իզմեստևի և նրա մոր ցուցմունքներն էին, որոնց համաձայն՝ Հայրապետյանն Իզմեստևի մորից 700 հազար դոլար էր վերցրել նրա որդու նկատմամբ դատավճռի մեղմացմանն աջակցելու խոստումով, սակայն չէր կատարել խոստումը։ Դատարանի վճռով Լևոն Հայրապետյանը մեղավոր է ճանաչվել 700 հազար դոլարի խարդախության մեջ։
