ԵՐԵՎԱՆ, 19 հոկտեմբերի — Sputnik. ՀՀ Վարչապետ Կարեն Կարապետյանն ընդունել է Հայաստանում Ռուսաստանի դեսպան Իվան Վոլինկինին, հայտնում է ՀՀ կառավարության լրատվական ծառայությունը։
Դեսպանն ու վարչապետը քննարկել են Ռուսաստանի Դաշնության վարչապետ Դմիտրի Մեդվեդևի՝ առաջիկայում Հայաստանի Հանրապետություն նախատեսվող պաշտոնական այցին և ՀՀ-ում անցկացվելիք Եվրասիական միջկառավարական խորհրդի նիստին վերաբերող հարցեր:
Զրուցակիցներն անդրադարձել են հայ-ռուսական դաշնակցային հարաբերությունների ընթացիկ օրակարգին:
Կարեն Կարապետյանը և Իվան Վոլինկինը կարևորել են նաև երկու երկրների միջև տնտեսական համագործակցության հետագա զարգացմանն ու ընդլայնմանը վերաբերող խնդիրներ, որոնց թվում են նաև երկու երկրների միջև առևտրաշրջանառության ծավալների ավելացմանն առնչվող հարցեր:
