ԵՐԵՎԱՆ, 25 սեպտեմբերի — Sputnik. ՌԴ վարչապետ Դմիտրի Մեդվեդևը Հայաստանում անցկացվող ԵԱՏՄ միջկառավարական խորհրդի մոտակա նիստում մտադիր է քննարկել մաքսային կարգավորմանը վերաբերող հարցերի կատարելագործմանն ուղղված ճանապարհային քարտեզը։
Վարչապետը փոխվարչապետների հետ խորհրդակցության ժամանակ անդրադարձել է 2012 թվականից գործող և մշտապես շտկվող մաքսային վարչարարության կատարելագործմանն ուղղված ճանապարհային քարտեզի իրականացման թեմային։
Խոսքը 19 նոր միջոցառումների մասին է, որով համալրվել էր «ճանապարհային քարտեզը»։ Դրանք վերաբերում են հսկիչ անցակետերի նախագծման և կառուցմանը, կրկնակի ստուգումների բացառմանը, փաստաթղթաշրջանառության ընթացակարգի պարզեցմանը վերաբերող նոր պահանջներին։
«Ես կշարունակեմ այս հարցերի քննարկումը Հայաստանում անցկացվելիք Միջկառավարական խորհրդի մոտական նիստին», – ասել է Մեդվեդևը փոխվարչապետների հետ խորհրդակցության ժամանակ։
Բոլոր այդ փոփոխությունները համաձայնեցված են ոչ միայն բիզնեսի ներկայացուցիչների հետ, այլև ԵԱՏՄ անդամ երկրների` նպատակ ունենալով առավելագույնս միավորել գործող կանոնակարգերը։
Այժմ վավերացման է նախապատրաստվում «Միության մաքսային օրենսգրքի մասին» պայմանագիրը, որը կարող է ուսումնասիրվել հոկտեմբերին, որպեսզի ուժի մեջ մտնի նախատեսված ժամկետում` 2018 թվականի հունվարի 1-ին։
ԵԱՏՄ–ն միջազգային ինտեգրացիոն միավորում է, որը ստեղծվել է Մաքսային միության և Միասնական տնտեսական տարածքի հիման վրա, գործում է 2015 թվականի հունվարի 1–ից։ Միությունը ստեղծված է ԵԱՏՄ երկրներում ծառայությունների, ապրանքների, կապիտալի և աշխատուժի ազատ տեղաշարժումն ապահովելու նպատակով։ ԵԱՏՄ անդամ են Ռուսաստանը, Հայաստանը, Բելառուսը, Ղազախստանն ու Ղրղըզստանը։
