ԵՐԵՎԱՆ, 18 հոկտեմբերի, — Sputnik, Լաուրա Սարգսյան. Հայ-վրացական «Բարեկամության կամուրջ» նախագծի կառուցման մրցույթի հաղթողին կընտրի նախագծի դոնորը` Վերակառուցման և զարգացման եվրոպական բանկը: Հաղթողը կընտրվի մինչև 2017 թ-ի ավարտը։
Հայկական և վրացական կողմերն ավելի վաղ նշել էին, որ «Բարեկամության կամուրջը» շահագործման կհանձնվի 2018 թվականին, իսկ շինարարությունը պետք է ավարտվի մինչև 2017 թվականը: Կամրջի մի կեսը կլինի Վրաստանի տարածքում, մյուսը` Հայաստանի:
«Մենք ընտրում ենք մրցույթի հաղթողին և այն ընկերությունը, որը կզբաղվի կամրջի կառուցման ինժեներական և տեխնիկական վերահսկողությամբ: Մենք կստորագրենք պայմանագրերը մինչև տարեվերջ, հետո կսկսենք նախագծի իրականացումը», — Sputnik Արմենիային ասաց Վրաստանի տարածքային զարգացման և ենթակառուցվածքների նախարարությանն առընթեր Ավտոճանապարհների վարչության պետի տեղակալ Նուգզար Գասվիանին:
Այս փուլում 25 մարդուց բաղկացած հայ-վրացական աշխատանքային խումբը հայտերի ամբողջական քանակից պետք է ընտրի ամենահավանական թեկնածուներին: Մրցույթի վերջնական հաղթողին կընտրի Վերակառուցման և զարգացման եվրոպական բանկը:
Ըստ Գասվիանիի` կամրջի կառուցումը կտևի մոտ մեկուկես տարի, հետևաբար այն կշահագործվի 2020 թվականից: Հետագա աշխատանքները կվերահսկվեն երկու երկրում ստեղծված առանձին խմբերը: Մրցույթին մասնակցելու համար դիմել են 68 կազմակերպություն:
Ծրագիրը կարևոր է ինչպես վրացական, այնպես էլ հայկական կողմի համար: Հայաստանի էկոնոմիկայի առաջին փոխնախարար Գարեգին Մելքոնյանն ավելի վաղ Sputnik Արմենիայի թղթակցի հետ զրույցում ընդգծել էր, որ «Բարեկամության կամուրջը» կարևոր է երկկողմ բիզնեսի զարգացման և անցակետում ծառայության մատուցման ժամանակի կրճատման տեսանկյունից:
«Մեր երկրների միջև ապրանքաշրջանառության աճին զուգահեռ, մեր առջև գործունեության և ծառայությունների բարելավման, թողունակության արագացման խնդիր բարձրացավ: Այս բոլոր նրբությունները կնպաստեն բիզնեսի զարգացմանը և կկրճատեն ծառայության ժամանակ: Դա թույլ կտա և՛ զբոսաշրջիկներին, և՛ գործարարներին սահմանին նվազագույն ժամանակ կորցնել», — ասաց Մելքոնյանը:.
Հայաստանի Հանրապետության և Վրաստանի պետական սահմանի «Սադախլո-Բագրատաշեն» անցման կետի տարածքում՝ Դեբեդ գետի վրա գործող կամուրջը կառուցվել է դեռևս 1960-ական թվականներին և ներկայիս վիճակով չի կարող ծառայել իր նպատակներին:
«Բարեկամության կամուրջ» կառուցելու հարցը վերջնական որոշում ստացավ ՀՀ նախագահ Սերժ Սարգսյանի, այնուհետև ՀՀ նախկին վարչապետ Հովիկ Աբրահամյանի` Թբիլիսի կատարած այցից հետո:
Բագրատաշեն-Սադախլո սահմանին գտնվող կամուրջը չափազանց հին էր և սպառել էր իրեն։ Վերակառուցման համար լուրջ ներդրումներ էին պետք։ Քանի որ ծախսերը մեծ էին, կողմերը որոշեցին եվրոպական չափանիշներին համապատասխան նոր կամուրջ կառուցել։ Հին կամուրջը կարելի է կարգի բերել, բայց փորձագետների կարծիքով` այն որպես այլընտրանք կծառայի խցանումների կամ տարբեր պատվիրակությունների կողմից հսկիչ-անցակետն արագ անցնելու դեպքում։
Կամրջի շինարարության ծրագրի պաշտոնական մեկնարկը տրվել է 2013 թվականին, իսկ վրացական կողմի ու Վերակառուցման և զարգացման եվրոպական բանկի հետ բանակցությունները շարունակվել են մինչև 2014 թվականը։
