Լաուրա Սարգսյան, Sputnik.
Մենք հսկիչ անցակետ հասանք ցերեկը ժամը մեկին, որոշ ժամանակ անց մեր խմբին միացան մրցույթի մասնակիցները և վրացական կողմից «Բարեկամության կամուրջ» նախագծի պատվիրատուները։
Բուռն քննարկումներ բանակցությունների սեղանի շուրջ
Մենք մտանք վրացական հսկիչ անցակետի շենք և բարձրացանք երկրորդ հարկ։ Սենյակում հավաքվել էին մրցույթի մասնակիցները և պատվիրատուները։ Բոլորը ցանկանում էին ստանալ իրենց հուզող հարցերի սպառիչ պատասխանները։ Հավաքվածների շարքում կային Իրանի, Հայաստանի, Չինաստանի և այլ երկրների քաղաքացիներ։
Ինչ-որ մեկը նոութբուքով տեքստ էր հավաքում, ոմանք ուշադիր լսում էին, մի քանիսը շշուկով զրուցում էին` փորձելով հասկանալ, թե որքանով է իրենց նախագիծը համապատասխանում
«Բարեկամության կամրջին»։
Այդ ընթացքում «Հյուսիս-հարավ» պետական կազմակերպության տնօրեն Արթուր Սարգսյանը և Վրաստանի Ավտոմոբիլային ճանապարհների դեպարտամենտի ղեկավարի տեղակալ Նուգզար Գասվիանին պատասխանում էին հարցերին։
Ինչպես պարզվեց, մրցույթը բաղկացած է երկու փուլից. առաջին փուլում կներկայացվի կամրջի նախագծման աշխատանքը, որը պետք է հիմնված լինի տեղանքի երկրաբանական և տեղագրական հետազոտությունների վրա։
«Խորհուրդ եմ տալիս ինքնուրույն հետազոտել տարածքը` հիմնվելով մեր ներկայացրած առաջնային հետազոտությունների տվյալների վրա։ Նախագծի դիզայնը պետք է նախապատրաստվի AutoCAD նախագծման նորարարական գործիքով»,- հավաքվածներին ասաց Արթուր Սարգսյանը։
Նախագծի շինարարի ընտրությունից հետո դիզայնը պետք է ներկայացվի երկու կողմերին, իսկ շինարարությունը կսկսվի այն բանից հետո, երբ նախագիծը հաստատեն ինչպես Վրաստանը, այնպես էլ Հայաստանը։ Մրցույթի երկրորդ փուլը նախագծի տեխնիկական փաստաթղթաբանության նախապատրաստումն է։
«Բարեկամության կամուրջը»` որպես օրինակ բոլորի համար
«Այդ նախագիծը, որի պատվիրատուն երկու երկրների ներկայացուցիչներն են, փորձնական է։ Համոզված եմ, որ «Բարեկամության կամուրջն» օրինակելի կլինի նաև այլ երկրների համար»,- ասաց Գասվիանին։
Նա համոզված է, որ այդ նախագիծը յուրահատուկ է։ Կամրջի շինարարության համար կնքվել է միջկառավարական պայմանագիր, որի համաձայն` աշխատանքային խումբն արդեն սկսել է անցկացնել համապատասխան ընթացակարգային աշխատանքներ։ Գասվիանին, ինչպես և Սարգսյանը, չի կասկածում, որ նախագիծը հաջող ընթացք կունենա։
«Հարց ու պատասխանի այս փուլին մասնակցել են բազմաթիվ կազմակերպություններ։ Տվյալ պահին մրցույթին մասնակցելու հայտ են ներկայացրել շուրջ 68 կազմակերպություններ»,- նշեց Սարգսյանը։ Նրա խոսքով` այդ փուլում լուծվել են տեխնիկական հարցեր, որոնց տրվել են պատասխաններ։
10 միլիոն դոլար արժողությամբ «Բարեկամության կամուրջ» հայ-վրացական յուրահատուկ նախագիծը շահագործման կհանձնվի 2018թ-ին։ Ծրագրի պաշտոնական մեկնարկը տրվել է 2013թ-ին, իսկ վրացական կողմի և Զարգացման եվրոպական բանկի հետ բանակցությունները շարունակվել են մինչև 2014թ-ը։
