ԵՐԵՎԱՆ, 17 հոկտեմբերի — Sputnik. Հայտնի դերասան Արմեն Ջիգարխանյանի կինը` Վիտալինա Ցիմբալյուկ–Ռոմանովսկայան չի իմացել իրենից բաժանվելու ամուսնու մտադրության մասին։ Այս մասին ՌԻԱ Նովոստիին պատմել է Վիտալինայի ներկայացուցիչը` Իրինա Մազուրը։
ԽՍՀՄ ժողովրդական արտիստն այս պահին գտնվում է Մոսկվայի 57 հիվանդանոցում։ Նրա առողջական վիճակը բժիշկները գնահատում են միջին ծանրության։
«Դերասանի առողջական վիճակի մասին պաշտոնական ինֆորմացիա, ինչպես նաև տեղեկություն այն մասին, որ նա պատրաստվում է բաժանվել կնոջից մենք չունենք»,–ասել է Մազուրը։
Լրատվական գործակալության զրուցակիցը հիշեցրել է, որ դերասանը հիվանդանոց է տեղափոխվել հոկտեմբերի 10–ին, նրա խոսքով` Ջիգարխանյանի առողջական վիճակն այդ օրից հետո քիչ թե շատ կարգավորվել է։
Հիշեցնենք, որ հոկտեմբերի 14–ին ռուսական ԶԼՄ–ները գրեցին, որ հայազգի ռուսաստանաբնակ դերասան Արմեն Ջիգարխանյանը հոսպիտալացվել է, բայց այս անգամ կտրականապես հրաժարվում է շփվել կնոջ հետ՝ նրան մեղադրելով իրեն սպանելու փորձի մեջ։Կինը՝ Վիտալինա Ցիբալյուկ-Ռոմանովսկայան իր հերթին է ոստիկաններին հաղորդում տվել, որ ամուսնուն անհայտ մարդիկ առևանգել են, որովհետև ցանկանում են զավթել նրա ղեկավարած թատրոնը։ Ինքն էլ ամուսնուն հայտնաբերել է հիվանդանոցում՝ մահամերձ վիճակում։Ավելի ուշ դերասանի քույրը` Մարինան, ասել էր, որ Արմեն Ջիգարխանյանի առևանգման մասին հաղորդումը իրականությանը չի համապատասխանում։
