ԵՐԵՎԱՆ, 17 հոկտեմբերի — Sputnik, Լաուրա Սարգսյան. Եվրամիության հետ Հայաստանի համապարփակ և ընդլայնված գործընկերության մասին համաձայնագրի ստորագրումը տեխնիկական պատճառներով կարող է հետաձգվել մինչեւ 2017 թ. դեկտեմբեր կամ 2018 թ. հունվար: Այդ մասին Sputnik Արմենիայի թղթակցի հետ զրույցում ասաց Միջազգային եւ անվտանգության հարցերի հայկական ինստիտուտի ասոցացված փորձագետ Գևորգ Մելիքյանը:
Հիշեցնենք, որ Հայաստան-Եվրամիություն գործընկերության վերաբերյալ համապարփակ և ընդլայնված համաձայնագրի ստորագրումը նախատեսված է ս.թ. նոյեմբերի 24-ին Բրյուսելում` արտաքին գործերի նախարարների գագաթնաժողովի շրջանակում։
«Հայաստան-ԵՄ ասոցացման համաձայնագրի ստորագրումը կարող է հետաձգվել մինչև դեկտեմբեր կամ 2018թ.-ի հունվար: Հնարավոր է, որ Եվրամիությունը մինչև նոյեմբերի 24-ը չհասցնի վավերացնել փաստաթուղթը բոլոր 28 անդամ պետությունների հետ», — Sputnik-ի թղթակցին ասաց Մելիքյանը:
Նրա խոսքով, Բրյուսելն ամեն ինչ անում է, որ Երևանի մոտ սևերես չլինի և հասցնի նշված ժամկետին, քանի որ հայկական կողմից ոչ մի խոչընդոտ չի սպառնում:
Փաստաթուղթը ստորագրելու համար Մելիքյանը Երևանի համար «վիճելի» չի համարում հայկական ատոմակայանի փակման և արդիականացված կայանի բացման հարցը:
Հայաստան-ԵՄ համաձայնագրի նախագծով նախատեսվում է փակել Մեծամորի ատոմակայանը` «հաշվի առնելով նոր հզորությամբ դրա փոխարինման անհրաժեշտությունը՝ Հայաստանի Հանրապետության էներգետիկ անվտանգությունը և կայուն զարգացման պայմաններն ապահովելու նպատակով»։
Սակայն Մեծամորի ատոմակայանի այլընտրանք առայժմ չկա երկրի էներգետիկ անվտանգությունն ապահովելու համար: Միակ երկարաժամկետ լուծումը նոր կայանն է, որի շինարարության համար պետական բյուջեում ևս անհրաժեշտ հինգ միլիարդ դոլար չկա:
Քաղտեխնոլոգ Վիգեն Հակոբյանն իր հերթին վստահ է, որ համաձայնագիրը կնքվելու է նոյեմբերի 24-ին:
«Ես չեմ կարծում, որ ստորագրումը կհետաձգվի, և կողմերը չեն հասցնի մինչև նոյեմբերի 24-ը, քանի որ նրանք պայմանավորվածության են հասել համաձայնագրի քննարկման վաղ փուլում: Բայց եթե անգամ այդպես լինի, ապա միայն տեխնիկական պատճառներով», — ասաց Հակոբյանը:
Նրա խոսքով, համաձայնագիրը 90%-ով պատրաստ էր մինչև նախաստորագրումը, որը տեղի ունեցավ ընթացիկ տարվա մարտի 21-ին Երևանում: Ինչ վերաբերում է հայկական ատոմակայանի կոնսերվացման կետին, ապա Հակոբյանը շեշտեց, որ «Երևանը այս իրավիճակից էլ ելք կգնի»:
«Արևելյան գործընկերություն» ծրագիրը Եվրամիության հետ ասոցացման հեռանկար էր նախատեսում։ Ծրագրվում էր, որ Երևանը ԵՄ-ի հետ ասոցացման ու ազատ տնտեսական գոտու մասին համաձայնագիրը կստորագրի 2013 թվականին Արևելյան գործընկերության վիլնյուսյան գագաթնաժողովի ժամանակ, սակայն դրանից երկու ամիս առաջ Հայաստանը հայտարարեց, որ մտադիր է Մաքսային միությանն անդամակցել ու մասնակցել եվրասիական ինտեգրմանը։ Հայաստանը Եվրասիական տնտեսական միությանը միացավ 2015 թվականի հունվարին։
ԵՄ խորհուրդը 2015 թվականի նոյեմբերի 12-ին Լյուքսեմբուրգում արտաքին գործերի նախարարների մակարդակով հանդիպման ժամանակ լիազորեց Եվրոպական հանձնաժողովին բանակցություններ սկսել Հայաստանի հետ նոր համապարփակ համաձայնագրի վերաբերյալ, որը կփոխարինի գործող համաձայնագիրը ԵՄ-ի և ՀՀ-ի միջև գործընկերության ու համագործակցության մասին գործող համաձայնագրին։
Հայաստանը հույս ունի փաստաթուղթը ստորագրել Արևելյան գործընկերության առաջիկա գագաթնաժողովի ժամանակ, որը տեղի կունենա 2017 թվականի նոյեմբերի 24-ին Բրյուսելում։
