ԵՐԵՎԱՆ, 17 հոկտեմբերի-Sputnik. Հայաստանը պլանավորում է էներգետիկ բնագավառի զարգացումը` ելնելով երկրի հիմնական ռազմավարական նպատակներից։ Այս հարցում ո՛չ ԵՄ համաձայնագիրը, ո՛չ էլ քաղաքական այլ հոսանքներ ազդեցություն չունեն։ Այս մասին այսօր լրագրողների հետ զրույցում հայտնեց արդարադատության նախարար Դավիթ Հարությունյանը։
«Մեր նպատակները քաղաքական որևէ ազդեցության ենթակա չեն, այլ պայմանավորված են էներգակիրների շուկայում առկա իրավիճակով, ժամանակակից տեխնոլոգիաներով, գներով ու մեր սպառողներով»,- ասաց Հարությունյանը։
Նրա խոսքով` մենք նոր ատոմակայան կունենանք, եթե այն գնային, սակագնային առումով լինի արդյունավետ։
«Պատկերացրեք մի պահ, որ ժամանակակից տեխնոլոգիաները հնարավորություն են ընձեռում ստանալ նույն քանակի էներգիա, սակայն առանց ատոմակայանի, և ատոմակայանի պարագայում, որն այդ պահին առկա է շուկայում, մեր էներգիան ավելի թանկ կլինի սպառողների համար։ Ո՞ր ճանապարհով մենք պետք է գնանք, անշուշտ ժամանակակից տեխնոլոգիաների»,- ասաց նախարարը։
Նա հայտնեց, որ Հայաստանում օգտագործվում է բարդ մաթեմատիկական մոդել, որն աշխարհում ամենուր ընդունված է որպես լավագույնը։ Այդ կանխատեսումների հիման վրա հասկանում են` որ ճանապարհն է արդյունավետ ՀՀ քաղաքացիների համար։
«Հնարավո՞ր է նոր տեխնոլոգիա առաջանա, որի հիմքում ոչ թե հարստացված ուրանն է, այլ հում ուրանը։ Կախված հում ուրանի հանքի շուկայական գներից և նոր տեխնոլոգիայի գնից` մենք կարող ենք վերանայել մեր մոտեցումն ու ասել, որ գնում ենք ոչ թե այս, այլ մեկ այլ ատոմակայանի ճանապարհով։ Այսինքն` հաշվի են առնվում բազմաթիվ գործոններ։ Իսկ հնարավո՞ր է, որ արևային էներգիայի հետ կապված վերջին տարիների էական արժեզրկումը բերի նրան, որ գուցե ճիշտ կլինի կառուցել ատոմային էներգակայան, իսկ որպես ռեզերվային` ունենալ ջերմակայաններ։ Դա էլ կախված կլինի գազի գնից»,-ասաց Հարությունյանը։
Նա հաստատեց, որ ատոմակայանը տալիս է էժան էլեկտաէներգիա, եթե կա արդեն կառուցված ատոմակայան, բայց այլ է իրավիճակը, երբ կառուցվում է նորը։
«Հենց որ սկսում եք հաշվարկել նոր ատոմակայանի համար արվող ներդրումները, դուք ունենում եք բացարձակապես այլ պատկեր։ Այն ամենևին էժան չի լինելու, ինչ այսօրվա ատոմակայանի արտադրանքը»,-ասաց նա։
Հարությունյանը նշեց, որ մեր երկիրն էներգետիկ անկախություն կունենար, եթե Հայաստանում լիներ հարստացված ուրանի հումքի արտադրություն։
