ԵՐԵՎԱՆ, 16 հոկտեմբերի — Sputnik. Իրաքյան ուժերը գրոհ են սկսել Քրդստանի ու Իրաքի միջև վիճելի տարածքներից մեկում` Քրիքուկում։
Այս մասին հաղորդում է ՌԻԱ Նովոստին` հղում անելով Al-Sumaria հեռուստաընկերությանը։
«Բախումը տեղի է ունեցել Իրաքի զինվորական ուժերի և քրդական զինյալների միջև, երկրի հարավային մասում»,–հեռուստաընկերությանը հայտնել է աղբյուրը` մանրամասնելով, որ անընդհատ կրակոցներ են հնչում այդ տարածքում։
Հայտնի է, որ Իրաքյան Քրդստանի ղեկավար Մասուդ Բարզանին հրամայել է քրդական զինյալներին կրակ չբացել Իրաքի բանակի դեմ, սակայն անհրաժեշտության դեպքում արժանի հակահարված տալ։
Իրաքի անվտանգության հարցով նախարարական խորհուրդը նշել է, որ դրանով Իրաքյան Քրդստանը պատերազմ է հայտարարում մյուս իրաքցիներին և մնացյալ ուժերին:
Խորհուրդը նաև ընդգծել է, որ իրենք ցանկանում են խաղաղություն հաստատել երկրի բոլոր անկյուններում և պաշտպանել Իրաքի բոլոր քաղաքացիներին, այդ թվում՝ քրդերին: Նախարարներն ավելացրել են, որ քրդերի հետ վիճելի տարածքները պետք է ղեկավարեն դաշնային իշխանության կողմից ղեկավարվող տեղական ուժերը:
Հիշեցնենք, որ սեպտեմբերի 25-ին Իրաքյան Քրդստանում տեղի ունեցած անկախության հարցով հանրաքվեին մասնակցած քաղաքացիների 93.29 տոկոսն «այո» է ասել անկախացմանը: Հանրաքվեին մասնակցել է ընտրողների 72,16 տոկոսը:
Իրաքի վարչապետ Հայդեր ալ Աբադին հանրաքվեն անվանել է հակասահմանադրական և հայտարարել է, որ Իրաքն այն չի ընդունելու: Հանրաքվեի անցկացման ու արդյունքներին դեմ են Թուրքիան և Իրանը, ինչպես նաև ԱՄՆ-ն և ՄԱԿ-ը:
