ԵՐԵՎԱՆ, 16 հոկտեմբերի — Sputnik. Հայաստանը լուրջ վերազինման կարիք ունի, պետք են հակատանկային միջոցներ և հակաօդային պաշտպանության ժամանակակից համակարգեր: Այս մասին Sputnik Արմենիային ասաց ռազմական փորձագետ Վլադիսլավ Շուրիգինը:
Հոկտեմբերի 12-ին Հայաստանի կառավարությունը հավանություն տվեց ՌԴ-ից Հայաստանին 100 մլն դոլարի ռազմական վարկ տրամադրելու մասին համաձայնագրի նախագծին:
«Հաշվի առնելով հավանական սպառնալիքները` Հայաստանը հակատանկային միջոցների, հետախուզության և կապի բարձր տեխնոլոգիական միջոցների, հակաօդային պաշտպանության ժամանակակից համակարգերի կարիք ունի», — ասաց Շուրիգինը:
Ըստ նրա` պարտադիր չէ, որ շարժական հակահրթիռային համակարգեր լինեն, կարող են լինել նաև անիվային, թրթուրավոր համակարգեր, օրինակ` «Ստրելա —10» և «Բուկ» հրթիռային համակարգեր:
Շուրիգինի խոսքով, կապի և հետախուզության լավ միջոցներն այժմ զենքից շատ ավելի կարևոր են:
«Ակնհայտ է, որ ցամաքային բանակին պետք են սպառազինություններ, քանի որ հիմնական սպառնալիքը, որին Հայաստանը կարող է բախվել, իհարկե, ցամաքային սպառնալիքն է», — ասաց Շուրիգինը:
«Հայրենիքի Արսենալ» ամսագրի ռազմական փորձագետ Ալեքսեյ Լեոնկովն էլ Sputnik Արմենիային ասաց, որ 100 միլիոնն այդքան էլ մեծ գումար չէ:
«Ամենայն հավանականությամբ, խոսքը կվերաբերի այն զենքին, որը կարելի կլինի գնել գոնե գումարտակի համար: Դա կարող է հրազեն լինել, գուցե նռնակներ», — ասաց Լեոնկովը:
Նրա խոսքով, թե կոնկրետ ինչ զենք կլինի, պարզ կդառնա պայմանավորվածությունների ավարտից հետո:
Միևնույն ժամանակ, ըստ նրա, Հայաստան ու Ռուսաստանը Հավաքական անվտանգության պայմանագրի կազմակերպության և նախկին համաձայնագրերի շրջանակներում կառուցում են միասնական փոխգործակցության համակարգ:
«Հայաստանը, փաստորեն, այն տարածաշրջանի սահմանագծին է, որտեղ կռիվներ են ընթանում: Նկատի ունեմ ԻՊ-ն, «անապատով վազվզող վարակը»: Նրանք կարող են հայտնվել Հայաստանի սահմանին», — ասաց Լեոնկովը:
Այդ վտանգների շրջանակում, ըստ նրա, ընդունվել է երկրների միջև փոխգործակցության երկարաժամկետ ծրագիր:
Նրանց գործընկեր, ռազմական փորձագետ, «Զենքի արտահանում» ամսագրի հրատարակիչ Ռուսլան Պուխովն էլ այս կապակցությամբ հիշեց պաշտպանության նախկին նախարարի տեղակալ Ալիկ Միրզաբեկյանից հետ ունեցած հարցազրույցը:
«Միրզաբեկյանը մի անգամ ասաց` եթե Հայաստանն այդպիսի հնարավորություն ունենար, ուրախությամբ օղակ (կամ նույնիսկ Su-30/35 կործանիչների մի էսկադրիլիա) ձեռք կբերեր», — ասաց Պուխովը:
Սակայն այս դեպքում, հավանաբար, խոսքն այդ զենքերին չի վերաբերի (մեկ օդանավի արտահանման արժեքը մոտ 50 միլիոն դոլար է):
Ռուսաստանը Հայաստանին կտրամադրի պետական արտահանման վարկ `ռուսական արտադրության ռազմական արտադրանքի մատակարարումը ֆինանսավորելու համար:
Վարկը տրամադրվում է 15 տարվա մարման ժամկետով` տարեկան 3% տոկոսադրույքով: Օգտագործման ժամկետը` 2018-ից մինչև 2022 թվականը:
Ավելի վաղ պաշտպանության նախարար Վիգեն Սարգսյանը հայտարարել էր, որ 200 մլն դոլարի առաջին ռուսական վարկի ռազմական մատակարարումները կավարտվեն մինչև 2017 թվականի վերջ: Վարկի մասին փաստաթուղթը ստորագրվել էր դեռ 2015 թ. հունիսի 25-ին, սակայն ուժի մեջ է մտել 2016 թ. փետրվարի 10-ից:
