ԵՐԵՎԱՆ, 7 սեպտեմբերի — Sputnik. Հայ-ռուսական պայմանավորվածությունները Երևանին թույլ են տալիս ռուսական ժամանակակից զենք գնել առավել մրցունակ պայմաններով, «Արմենիա» հեռուստաընկերության եթերում ասել է ՀՀ պաշտպանության նախարար Վիգեն Սարգսյանը։
«Մեր հիմնական դաշնակիցն այսօր աշխարհում զենքի ամենախոշոր մատակարարներից մեկն է։ Նրա հետ մենք պայմանավորվածություններ ունենք, որոնք թույլ են տալիս ժամանակակից սպառազինություն գնել ամենամրցունակ պայմաններով»,- ասել է Սարգսյանը, որն այս պահին պաշտոնական այցով Չինաստանում է։
Նախարարի խոսքով` հայկական կողմը կարող է երկխոսություն վարել նաև զենք մատակարարող այլ երկրների հետ, եթե ի հայտ գան այնպիսի հնարավորություններ, որոնք կհետաքրքրեն Երևանին։
Սարգսյանը նշել է` 10 միլիոն յուանի օգնությունը, որը Հայաստանին է տրամադրելու Չինաստանը, կուղղվի չթռչող տեխնիկայի ձեռքբերմանը, ինչպես պահանջում են միջազգային կանոնները։
Նախարարը կարծում է, որ դրանք կարող են լինել կապի միջոցները, դիտող սարքերը և այլն։
Նշենք, որ Վիգեն Սարգսյանի` Չինաստան կատարած այցի ընթացքում ստորագրվել է 10 միլիոն յուանի (մոտ 1 մլն 540 հազար ԱՄՆ դոլար) օգնության տրամադրման համաձայնագիր։
