ԵՐԵՎԱՆ, 13 հոկտեմբերի — Sputnik, Լաուրա Սարգսյան. Հայաստանում ռուսերեն սովորողների թիվը նվազել է, քանի որ տնտեսապես շահութաբեր չէ, Sputnik Արմենիայի թղթակցի հետ զրույցում ասաց Մոսկվայի Լոմոնոսովի անվան պետական համալսարանի Երևանի մասնաճյուղի ուսումնական գծով գործադիր տնօրենի տեղակալ Ժան Բաղյանը:
«Հատկապես դպրոցականների շրջանում ռուսաց լեզվի իմացության ցածր մակարդակը հիմնականում պայմանավորված է տնտեսական բաղադրիչով: Բարձր աշխատավարձով վարձատրվող աշխատանքի ընդունվելու համար ռուսերենի իմացությունը պարտադիր չէ», — ասաց Բաղյանը:
Սակայն այդ հարցն աստիճանաբար լուծվում է: ԵԱՏՄ անդամակցությունից հետո բիզնեսի ոլորտի ավելի ու ավելի շատ ներկայացուցիչներ են շահագրգռված, որ ռուսական կապիտալով ընկերություններ բացեն Հայաստանում: Ըստ Բաղյանի, այդ հանգամանքը կբարձրացնի ռուսերենի իմացության մակարդակը Հայաստանում:
Ավելի վաղ այս թեմային անդրադարձել էր նաև ՀՀ կրթության և գիտության նախարար Լևոն Մկրտչյանը և նշել, որ ռուսերենը ՀՀ-ում պետք է գրավի իր արժանի տեղը մյուս օտար լեզուների կողքին։
«Դպրոցներում երկրորդ դասարանից ռուսաց լեզու են անցնում, որովհետև այն ԱՊՀ երկրներում և ԵԱՏՄ համագործակցության աշխատանքային լեզուն է։ Գիտական և ռազմաարդյունաբերական համալիրի գիտական դաշտի մեծ մասը ռուսաց լեզվով է», — ասել էր Մկրտչյանը:
Բաղյանն իր հերթին ռուսաց լեզվի իմացության ցածր մակարդակը կապում է Խորհրդային Միության փլուզման հետ:
Հայաստանում ռուսաց լեզվի բարելավման առաքելությունն իրականացնում են այն բուհերը, որտեղ ուսուցումն իրականացվում է ռուսերեն լեզվով: Այդ նպատակով Մոսկվայի Լոմոնոսովի անվան պետական համալսարանի մասնաճյուղի և Ռուս-Հայկական (Սլավոնական) համալսարանի բազաների հիման վրա բացվել են ռուսալեզու դպրոցներ:
«Միևնույն ժամանակ մենք աշխատում ենք բարելավել ռուսերենի իմացության մակարդակը հայկական դպրոցներում: Մենք սկսեցինք այն դպրոցներից, որտեղ դասավանդվում է ռուսերենը, որտեղ կան ռուսերենի խորացված ուսուցմամբ ավագ դասարաններ », — ասաց Բաղյանը:
Պարբերաբար անցկացվում են ռուսերենի ուսուցիչների որակավորման դասընթացներ:
Հայաստանի կրթության և գիտության նախարարությունը մշակել և այս տարվա սեպտեմբերին հանրային քննարկման է ներկայացրել դպրոցներում ռուսաց լեզվի իմացության մակարդակի բարձրացման հայեցակարգի նախագիծը: Փաստաթղթի տեքստում նշված է, որ հայեցակարգի տեքստում էլ հստակ նշված է` Հայաստանի Հանրապետության կրթական համակարգում անհրաժեշտ է կատարել բարեփոխումներ, որոնք քաղաքացիներին հնարավորություն կտան տիրապետելու մի քանի օտար լեզուների, ինչպիսիք են ռուսերենը, մեկ կամ մի քանի եվրոպական (անգլերեն, ֆրանսերեն, գերմաներեն և այլն) և արևելյան (արաբերեն, պարսկերեն, չինարեն և այլն) լեզուներ:
