ԵՐԵՎԱՆ, 22 սեպտեմբերի — Sputnik. Այսօրվա պայմաններում Հայաստանին պետք է ռուսերենը, այսօր լրագրողներին ասաց ՀՀ կրթության և գիտության նախարար Լևոն Մկրտչյանը։
Նա նշեց, որ դպրոցներում 2-րդ դասարանից պարտադիր անցնում են ռուսաց լեզու, որովհետև այն ԱՊՀ երկրներում և եվրասիական տնտեսական համագործակցության աշխատանքային լեզու է։ Գիտական և ռազմարդյուանբերական համալիրի գիտական դաշտի մեծ մասը ռուսաց լեզվով է։
Ավելի վաղ Հայաստանի կրթության և գիտության նախարարությունը մշակել ու հանրությանն է ներկայացրել հայկական դպրոցում ռուսերենի իմացության մակարդակի բարձրացման նախագծի հայեցակարգը։ Ինչպես նշվում է փաստաթղթի տեքստում` Հայաստանի Հանրապետության կրթական համակարգում անհրաժեշտ է կատարել բարեփոխումներ, որոնք քաղաքացիներին հնարավորություն կտան տիրապետելու մի քանի օտար լեզուների, ինչպիսիք են ռուսերենը, մեկ կամ մի քանի եվրոպական (անգլերեն, ֆրանսերեն, գերմաներեն և այլն) և արևելյան (արաբերեն, պարսկերեն, չինարեն և այլն) լեզուներ:
Ինչպես նշեց նախարարը,հայ դպրոցականները պետք է իրենց իսկ բարօրության համար առնվազն ռուսերեն ու անգլերեն պետք է սովորեն։
«Հիմնական նպատակը օտար լեզուների, այդ թվում ռուսերենի, իմացության մակարդակի բարձրացումն է։ Իսկ ռուսերենի շուրջ աղմուկը քաղաքականացված է։ Նոր հայեցակարգի համաձայն` ռուսերենը օտար լեզվի կարգավիճակ ունի։ Ընդ որում` մեր դիմորդները բուհ ընդունվելիս կարող են հանձնել անգլերենի, ֆրանսերենի, գերմաներենի, իսպաներենի, իտալերենի քննություն, իսկ ռուսերեն քննություն կարող են չհանձնել։ Ի՞նչ կարգավիճակ ունի ռուսաց լեզուն», — հարցրեց Մկրտչյանը։
Նախարարը նշեց, որ անգլերենի, գերմաներենի ու ռուսերենի զարգացման նպատակով համագործակցություն է սկսվել Գյոթեի անվան ինստիտուտի, Հայաստանում Գիտության և մշակույթի ռուսական կենտրոնի, նաև անգլերենի մասնագետների հետ։
Մկրտչյանը պատասխանեց նաև հարցին, թե Կարեն Կարապետյանն այդ հայեցակարգի վերաբերյալ հանձնարարակա՞ն է տվել։ Նախարարի խոսքով` վարչապետը միայն հանձնարարել է Հայաստանում օտար լեզուների իմացության մակարդակը բարձրացնել, իսկ ռուսերենի դասավանդման հայեցակարգ մշակելը Մկրտչյանի առաջարկությունն է եղել։
«Մենք պետք է աշխատենք դպրոցում օտար լեզուների խորացված ուսումնասիրության ուղղությամբ։ Ուսուցիչները վերապատրաստում անցնելու հնարավորություն կստանան, մենք 1200 ուսուցչի վերապատրաստման խնդիր ունենք», — ասաց Մկրտչյանը։
Մկրտչյանը նշեց, որ ինքը միշտ դեմ է եղել օտարալեզու դպրոցների գաղափարին, որովհետև այլ լեզուներ կարելի է սովորել` ստանալով հայկական կրթություն։
Նախարարը ևս մեկ անգամ հորդորեց չքաղաքականացնել ռուսաց լեզվի խորացված ուսուցումը։
