ԵՐԵՎԱՆ, 11 հոկտեմբերի — Sputnik. Ռուսաստանի Դաշնությունում Հայաստանի դեսպանատան շենքը, որը գտնվում է Հայկական նրբանցքում, ընդգրկվել է Մոսկվայի ոչ ստանդարտ վայրերի լավագույն տասնյակում: Այս մասին գրում է Metro պարբերականը:
Հայաստանի դեսպանատան շենքը յոթերորդ հորիզոնականն է զբաղեցնում վարկանիշում:
«Այս հիանալի շենքը պատմության մեջ մտավ որպես Լազարևի Արևելագիտության ինստիտուտ: Այն կառուցվել է հայազգի Լազարևի ընտանիքի միջոցներով` որպես դպրոց աղքատ երեխաների համար: Նրանց պահել ու ուսուցանել են անվճար հիմունքներով` ի տարբերություն այլ ազգությունների աշակերտների», — գրում է թերթը:
Ցուցակում են ընդգրկվել նաև Չիստիե Պրուդի մետրոյի կայարանը, Գաբրիել Հրեշտակի տաճարը, ճարտարագետ Վլադիմիր Շուխովի տունը (Կրիվոկոլեննի նրբանցք, 11/13), Հրամանատարների պուրակը, Դպրոցական շենքը (Հայկական նրբանցք, 3/5, էջ 9), «Մոսկվայի լույսեր» թանգարանը (Հայկական նրբանցք, 3/5, էջ 1), Տնտեսագիտության Բարձրագույն Դպրոցի բաժանմունքները, (Հայկական նրբանցք, 4, էջ 2), Կառավարությանը կից ֆինանսների համալսարանը, Մատվեյ Կազակովի ճարտարապետական դպրոցը:
Հայկական նրբանցքի անվանումը պատահական չէ. այս տարածքի տները 18-րդ դարից ի վեր պատկանում էին հարուստ վաճառական Լազար Նազարովիչ Լազարյանին, որին 1774 թ. մայիսին կայսրուհի Եկատերինա II-ը տվեց ժառանգական ազնվականություն: Այնուամենայնիվ, կան տեղեկություններ, որ հայերն այստեղ ապրել են դեռ 16-րդ դարից: Լազար Լազարյանը Պարսկաստանից էր, Ռուսաստանի կայսրությունում զբաղվել է մետաքսի և թղթի արտադրությամբ, բավականաչափ հաջողությունների է հասել: Ավելի ուշ նա զբաղվել է հանքարդյունաբերությամբ:
Շուտով, լինելով Մոսկվայի ամենահարուստ առևտրականներից մեկը, նա փոխել է իր ազգանունը (Լազարև) և 1758 թվականին առանձնատուն է գնել այն վայրում, որն այժմ Հայկական նրբանցք է կոչվում:
Չի բացառվում, որ Լազարևի առանձնատան մի մասն ի սկզբանե պատկանել է Միլոսլավսկիների ընտանիքին։ Վերջերս ռեստավրատորները տարածքի աջ մասում պալատներ են բացել: Այս անհավատալի գեղեցկությամբ շենքը պետք է պատկաներ XVII դարում շատ հարուստ ընտանիքի: Պատմաբանների կարծիքով, Միլոսլավսկիների առանձնատունը նայում էր ուղիղ մոտակա Կրիվոկոլեննի նրբանցքին և, հետևաբար, կարող էր լինել Լազարևի ապագա առանձնատան մի մասը:
