ԵՐԵՎԱՆ, 11 հոկտեմբերի — Sputnik. Սոչիում կայացած ԱՊՀ պետությունների ղեկավարների խորհրդի նիստում ելույթ է ունեցել նաև ՀՀ նախագահ Սերժ Սարգսյանը, տեղեկացնում է նախագահի պաշտոնական կայքը։
Նա շնորհակալություն է հայտնել ջերմ ընդունելության համար և ընդգծել, որ հանդիպման օրակարգում ներառված հարցերն արտահայտում են ԱՊՀ-ում Ռուսաստանի Դաշնության ակտիվ նախագահության արդյունավետությունը՝ ուղղված նախ և առաջ հետագա զարգացմանը։ Սերժ Սարգսյանն անդրադարձել է ԱՊՀ-ի և միջպետական համագործակցության համար արդիական մի քանի թեմաների:
«Մենք աջակցում ենք ռուսական կողմի ներկայացրած ընտանիքի ինստիտուտին և ավանդական ընտանեկան արժեքներին աջակցելու մասին հայտարարությանը` հրաշալի գիտակցելով, որ ընտանիքի ինստիտուտը հասարակության հիմքն է, ինչպես նաև ժողովուրդներին միավորող գործոն:
Հետաքրքրված լինելով հումանիտար ոլորտում համագործակցության ընդլայնմամբ՝ կարծում ենք, որ «Մշակութային մայրաքաղաքներ» միջպետական ծրագիրն օգտակար նախաձեռնություն է ԱՊՀ պետությունների մշակութային կապերի պահպանման և զարգացման գործում:
Հաջորդ տարի նախատեսվում է հայկական Գորիս քաղաքը հայտարարել համագործակցության մշակութային մայրաքաղաք: Հրավիրում ենք ԱՊՀ երկրների ներկայացուցիչներին մասնակցելու այն միջոցառումներին, որոնք այդ տարվա ընթացքում կանցկացվեն Հայաստանի Սյունիքի մարզի այդ հրաշալի անկյունում:
Կցանկանայի նաև ընդգծել 2019 թ. Գրքի տարի, իսկ 2020 թ. Մեծ Հայրենական պատերազմում հաղթանակի 75-ամյակի տարի հռչակելու կարևորությունը»,- ասել է նախագահը:
Նա հիշեցրել է, որ հինգ տարի առաջ՝ հայկական գրատպության 500-ամյակի կապակցությամբ, ՅՈՒՆԵՍԿՕ-ն Երևանը հռչակեց գրքի համաշխարհային մայրաքաղաք, որը լայնորեն նշվեց մեծ թվով հյուրերի, այդ թվում նաև՝ ԱՊՀ երկրներից, մասնակցությամբ, քանի որ ընթերցող, զարգացած հասարակություն ունենալը համար կենսական կարևորություն ունեցող պայման է:
Սերժ Սարգսյանը համոզմունք է հայտնել, որ Մեծ Հաղթանակի առաջիկա հոբելյանը ևս մեկ առիթ է հարգելու ֆաշիզմի դեմ պայքարում զոհվածների հիշատակը, Հայաստանում չկա որևէ ընտանիք, որի կողքով անցած լինի այդ ողբերգությունը. առաջնագիծ զորակոչված յուրաքանչյուր երկրորդ հայը հետ չի վերադարձել. դա նաև լավ առիթ է ֆաշիզմի գաղափարախոսության վերակենդանացման փորձերի, աշխարհում քսենոֆոբիայի և ռասիզմի տարածման դեմ համագործակցաբար հանդես գալու համար:
«Հայաստանը բազմիցս ընդգծել է միջազգային հանրության ջանքերի համախմբման անհրաժեշտությունն այնպիսի դրսևորումների դեմ պայքարում, ինչպիսիք են միջազգային ահաբեկչությունը, ծայրահեղականությունը և կազմակերպված հանցավորությունը: Աջակցում եմ համապատասխան փաստաթղթերի ընդունմանը, որոնք կանոնակարգում են ԱՊՀ երկրների համագործակցությունը հանցավոր ճանապարհով ձեռք բերված եկամուտների օրինականացման, ահաբեկչության ֆինանսավորման, թմրաբիզնեսի և միջազգային բնույթի այլ հանցագործությունների դեմ պայքարում»,- հայտարարել է նախագահը:
Սերժ Սարգսյանը հաջողություն է մաղթել տաջիկ գործընկերներին և անձամբ նախագահ Էմոմալի Ռահմոնին, որը ստանձնում է ԱՊՀ նախագահությունը, ինչպես նաև պատրաստակամություն է հայտնել աջակցելու նախատեսված ծրագրերի իրականացմանը՝ ի շահ ԱՊՀ-ի:
ԱՊՀ երկրների ղեկավարները հավաքվել են Սոչիում՝ քննարկելու համագործակցության աշխատանքների արդյունավետությանն ուղղված քայլեր։ Խորհուրդը կստորագրի նաև մի շարք փաստաթղթեր։
